صليت الفجر وجيت راجع للبيت إلا وألاقي الحرمة مسنترة عند الباب ولابسة عبايتها .. على فين كده لابسة عبايتك؟ يا ناس شوفوا الراجل ده دحين أنا ما كلمتك أمس في الليل وقلتلك لما ترجع من صلاة الفجر حنروح البنقلة؟ يوووه نسيت صح كلامك (قلت بيني وبين نفسي والله وكبرت يا فتحي وشكلوا الزهايمر بدأ يعشعش عندك)، قاعد تبربر تقول إيش؟ ولا أبربر ولا ألغمط ياستي يللا انزلي والحقيني على السيارة خلينا نلحق البنقلة قبل ما تنزحم؟ حاضر ياسيدي دقايق واكون نازلة، وركبنا السيارة وجالس أمشي على مهلي لا يروح العم (ساهر) ويلقطنا بصورة 150 في 150 لأنه زي منتو عارفين انه القسايم صارت مدبلة ونحنا الغلابا مو ناقصين وجع قلب اللي فينا كافينا ،ارتفاع الأسعار من جنب والإيجارات من جنب وكل شي يخطر في بالكم ماشي على كيفو لا حسيب ولا رقيب على قول أخينا غوار الطوشه (كل مين إيدو إيلوو) المهم وصلنا البنقلة وعينك ما تشوف إلا النور زحمة ياكترها حريم ورجال من كل جنس ولون وأشكال وأنواع من الأسماك وسبحان الخالق، ومن بسطة لبسطة عشان نشوف أسعار السمك، ونوقف عند بسطة من البسطات وأشوف اللوحات كلها باسم سعودي لكن اللي يبيع ويشتري أخ من اللي ما شاء الله عليهم حاسونا في البلد حوس واللي مكوشين على أغلب المحلات التجارية في البلد وربنا يستر، المهم أسأل أخينا وأقوله بكم الديرك ياجعفر؟ أنا مافي جعفر أنا اسم حقي جهانقير، طيب سامحنا آسفين ياجهانقير بكم الديرك؟ ديرك كيلو 40ريال، ول ول ليه كده كان الكيلو ب20؟ سمك كلوو في بنقلة غالي، وبكم شكة الشعور دي كمان؟ شكة شعور ب 250، وي وي ايشبهم ياسيدي دوول الناس اجننوا في عقلهم وإلا إيش قبل فترة لما نزلنا كان السعر أقل من كده الديرك الكيلو كان ب 20 والبياض كان ب 25 والشعور كان ب 15 ريال حتى القنبري اللي كان سعرو ب 30 و40 صارب 70 لا ياسيدي العالم دي مو صاحية جالسين يلعبوا في سوق البنقلة على كيفهم، مو هوه لازم ياستي يلعبوا في سوق البنقلة على كيفهم لانه ما عندك أحد كله مكبر المخدة وكله بيلعب في سوق السمك على كيفو ولا رقابة ولا يحزنون، المحرجين من جنب والعمال البنقالة اللي شايفاهم قدامك من جنب والشركة اللي ماسكة سوق السمك من جنب والمستهلك الغلبان هوه اللي يروح في خرخر والمصيبة الكبيرة انه السمك اللي انتي شايفاها كلوو متلج ومبرد وله شهور مخزن في سيارات التبريد وبرضوو سعرو غالي ويضحكوا على الناس ويقولك طازة وصدناه في الليل وكله بكش في بكش، المهم اشترينا السمك اللي قدرنا عليه من البنقالي ورحنا وزناه وبعد الوزن قشرناه وبرضو اللي قشروا بنقالي ونحنا رايحين للسياره وقف قدامي حمال الا مصمم يوصل السمك للسيارة وبرضو الحمال بنقالي، قلت في نفسي الله يرحم أيام زمان أيام ماكانوا أجدادنا وأباءنا هما اللي ماسكين البنقلة والله يسامحكم يا بعض شباب بلدي لو عرفتوا الرزق اللي يجي من بيع السمك ومن التجارة ماجلستوا عاطلين وتستنوا حافز لكن إيش نقول كل واحد عقلوا في راسوا يعرف خلاصوا.. وعيشوا كتيييير تشوفوا كتيييير. للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة. [email protected]
