البنات صاروا (مُتان) يا سيدات الأعمال

بالبلدي الفصيح

كل عام وانتو بخير يا حبايب ورمضان كريم علينا وعليكم وسامحوني على غيابي عليكم بس زي ما بيقولوا مكره صاحبك لا بطل على العموم تعالوا نشوف ايش بتقول هرجتنا حق اليوم ، دحين انتي وبنتك من ساعة مادخلتوا البيت (ونفسكم مقطوع) وكل الحكاية كيلو واحد مشيتوه للجيران اللي جنب البيت انتي ارتميتي على الكنبة وبنتك ارتمت على الكرسي وصوت زفيركم وشهيقكم واصل لآخر الشارع اللي يشوفكم يقول جايين من سباق 400 متر تتابع وكل الحكاية كيلو واحد مشيتوه رايح جي، جالس تتريق حضرتك بدل ما تشوف لنا حل في المصيبة دي اللي جالس بيعاني منها كل بنات وحريم البلد وبعدين يكون في علمك كنت انا وفتو بنطلع السطوح نمشي ونجري لكن حبايبك حقون امانة جدة ما يعجبهم العجب ولا الصيام في رجب لازم يعكننوا على عباد الله بعد ما سمحت لاصحاب العماير انهم يبنوا 7 و 10أدوار في الاحياء وبكده يا مليح انكشف علينا السطوح وحرمونا من المشي والجري والمصيبة الكبيرة انها اللي هية الامانة ما فكرت مجرد تفكير انها تسوي حدائق وممشى في الاحياء خاصة للحريم بس وزي منت عارف كل قطعة ارض موجودة في رسم الكروكي حق الحي واللي المفروض تكون حديقة او ممشى صارت بقدرة قادر ملك من املاك هوامير الاراضي اللي انت خابرهم هدا غير انه المستشفيات الخاصة فيها نوادي بس رسومهم تقصم الظهر والاسوار اللي موجودة في جدة زي سور الحوامل وسور المطار القديم وسور حي النسيم كلها ما فيها فائدة لانه بعض الشباب الله يهديهم ويصلحهم ما يتركوا العالم في حالها شغالين زي الرادار بعيونهم وتجي تقوللي شهيق وزفير، اكتب لسيدات الأعمال اللي مدكنات الملايين في البنوك المحلية والخارجية وخليهم يسوو مشاريع اندية نسائية يشتغلوا فيها حريم وصدقني حيكسبوا ذهب وملايين وبكده ما حيكون عندنا حريم ولا بنات متان لانه ممارسة الرياضة مهمة والسبب الرئيسي في مشكلة السمنة اللي بيعاني منها كل حريم وبنات البلد جية من قلة الحركة وكتر النوم والاكل وخاصة المأكولات السريعة لكن لو في اندية نسائية خاصة ماحتزيد نسبة البنات المتان في البلد الا اذا وحدة غاوية تكون متينة والا انت ايش رأيك ياسيدي؟ اقولك لا تجيبي لي مصيبة وتحشريني بينكم انا مالي ومال كلام الحريم هدا المقال حتشوفه كل بنت وكل حرمة وحيشوفوه وحيقروه كل سيدات الأعمال وجوابك عندهم وهم أدرى وإني امرؤ صائم وعيشوا كتييييير تشوفوا كتيييييير.
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة