زوجوني..!!

بالبلدي الفصيح

يا عيني يا عيني، إيش عنوان المقال ده، تبغى تتزوج عليا ياسيدي؟. لا حول ولا قوة إلا بالله، دحين عشان عنوان المقال كده صار عندك زواج، يا بنت الحلال لا يلدغ المرء من جحر مرتين اللي فينا كافينا، قال زواج قال، من جد بعض الحريم عقولهم زي الكيلون كلمة توديها وكلمة تجيبها. جالس تبربر وتلغمط بتقول إيش؟. لا أبربر ولا غيرو روحي زبطي براد الشاهي خليني أكمل مقالي. حاضر ياسيدي.
وانا راجع للبيت بعد ما صليت العشا، لقيت ولد جارنا جالس على درج العمارة سرحان ويفكر.. رفعت صوتي بالسلام، رد عليا وهوه (مدنق) راسه ويطالع في الأرض، قلتله إيش الحكاية يا فاروق؟ قال ولا شي بس طفشان شوية. شمرت التوب وقعدت معاه على الدرجة، وقلتله هات الهرجة، ما حسيبك وانت متنكد كده، وبعد ما نشف ريقي نطق وجلس يتكلم وقال: ليا خمس سنوات يبو فتو أنا متخرج من الجامعة، زي منت عارف وكل يوم والتاني وانا أبرم على الشركات والمصانع والمؤسسات عشان أبغى أحصل وظيفة آكل منها عيش، المهم ربك ييسرها ولقيت وظيفة راتبها ألفين ريال، يعني راتب سواق أو شغالة في الزمن ده، بالله عليك هادي الألفين اللي بستلمها كل شهر إيش حتسوي في الزمن ده؟ صدقني يبو فتو ألفين ريال ماتسوي شي في هذا الزمن، كيف بالله أقدر (ألملم) قرشين عشان أتزوج؟ كيف حقدر أدفع مهر؟ كيف حقدر استأجر شقة وأفرشها؟ وانت عارف كيف صارت الإيجارات غالية، صدقني يبو فتو هادي الألفين يادوب تكفيني للأكل والشرب والبنزين وزيت السيارة وبس. ، عشان كده بتمنى نشوف حل لهادي المصيبة اللي بيعاني منها شبابنا وبناتنا قبل ما تجي الفاس في الراس.. وعيشوا كتيييير تشوفوا كتيييير.
abofatoo@hotmail.com