دحين انت جايب اولاد وبنات الجيران معانا ليه؟ ياستي خليهم يتمشوا طالما خلصوا من التقويم الدراسي اللي حينكبهم بعد كده وخليهم يغيروا جو ويتفسحوا طالما انهم محبوسين بين اربعه جدران لانه بعض الاحياء اللي في جدة ما فيها حدايق يتفسحوا فيها اهل الحي، وعلى فين كده حتودينا ياسيدي؟ حوديكي ياستي على الحديقة الجديدة اللي اسمها حديقة السلام الصخرية ولسه ما خلصت كلامي الا اسمع زعيق الاطفال هيييييييه من فرحة الخبر اللي سمعوه، طيب انت ياسيدي ايش عرفك انه في حديقة جديدة؟ ياستي كان في خبر منشور قبل حوالي شهر تقريبا بيقول انه في حديقة جديدة على طريق الملك عبدالعزيز وقريبة من الكورنيش وسموها حديقة صخرية لانه فيها صخور تجميلية موزعه على امتداد الحديقة عشان يعطوا للحديقة شي من الجمال ومساحة الحديقة 36 الف متر مربع وفيها مساحات خضراء كبيرة ومراجيح وزحلقات للاطفال عشان ينبسطوا. وأول ما سمعوا الاطفال مراجيح وزحلقات الا ودول زعقوا هيييييه، المهم بعد نص ساعة وصلنا للحديقة وكانت ماشاء الله مزحومة بالزوار واول ماوقفت السياره الا والاطفال نزلوا زي الصواريخ على المراجيح المهم اخدنا فرشتنا وقهوتنا وشاهينا وتكينا أنا والحرمة وانا بنقنق في الشاهي والمكسرات الا وتجي عيني على اصحاب الدبابات الصغيرة اللي بيؤجروا دباباتهم للاطفال وتلاقي الطفل يبرم حولين الحديقة الين جاب للزوار الصنج من اصوات الدبابات اللي شغاله، هدا غير اصحاب الاحصنة اللي برضوا بيؤجروا هادي الاحصنة للاطفال والله عالم كيف صحتها هيه مريضة او سليمة، المصيبة انه هادول اصحاب الدبابات واصحاب الاحصنة ما يصدقوا يلاقوا مكان نتفسح فيه الا ويجوا يعكننوا علينا فيه باصوات دباباتهم المزعجة وبالاحصنة الصغيرة اللي الله عالم كيف صحتها، وشوية يجيني طفل من الاطفال ويوشوشني، رديت علية ده وقته ياولدي امسك نفسك على بال ما نرجع للبيت مافي فايدة يبغى حمام الأخ وسألت واحد من الزوار قلتلو مافي دورات مياة في الحديقة؟ رد عليا وهوه مضايق وزعلان وقال حرام ده اللي جالس بيصير حديقة كبيرة وجميلة بالشكل ده كلفتهم 8 مليون ريال ما يكون فيها حمامات للرجال وحمامات للحريم ومصلى للرجال ومصلى للحريم هدا غير انه مافيها اكشاك صغيرة تبيع المواد الغذائية الخفيفة، والمفروض كمان انه يكون فيها سور أو مصدات خرسانية عشان نحمي اطفالنا من السيارات المسرعه اللي قدام الحديقة.. تركني الراجل وهوه يقول حسبي الله ونعم الوكيل، وشويه يجيني طفل تاني وبرضو وشوشني قلت في نفسي ايش المصيبة دي مسكتهم من يداتهم وجلست ادور على مكان مزوي يتصرفوا فيه المهم لقيت المكان قلت للأول انت روح هنا وقلت للتاني انت روح هنا وكلها دقايق ورجعولي وكل واحد منهم نافش ريشوا المهم اخدت بعضي ورحت للحرمه وقلتلها لملمي العفش لا يجوني بقية الاطفال ويكملوا الناقص خلينا نرجع للبيت وتوبه بعد كده اروح لهادي الحدايق وعيشوا كتييير تشوفوا كتيييير هرجه / يا مسؤولي أمانة جدة دخيلكم لما تسووا حدايق بالمساحات الكبيرة دي وتصرفوا عليها الملاييين خلوا بالكم من الاساسيات وسيبوكم من الزبرقه اللي ما منها فايدة. مثل حجازي / من بره الله الله ومن جوه يعلم الله abofatoo@hotmailcom للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.
