المدارس والملازم

بالبلدي الفصيح

دحين انت مخرجني في العصرية دي رايح على فين طالع كوبري ونازل من كوبري وداخل من نفق وخارج من نفق، طولي بالك وابلعي ريقك وبعدين على سيرة الكباري والانفاق اللي بتقولي عليها المفروض تكون موجودة من زمان لكن الله يسامح اللي كان السبب ترك جدة من غير تطوير اكتر من 15 سنة لكن دحين الحمدلله بدأت مشاريع الطرق تنتهي وحنفتك من زحمة الشوارع ودوشتها، طيب برضك ياسيدي ما قلتيلي فين رايح ؟ ثواني بس خليني ادخل يمين من شارع المخزومي وندخل على الشارع الفرعي اللي ينزل على باب مكه وانا اخليكي تشوفي اكبر معرض ازياء في جدة، من جد ياسيدي عندنا معرض ازياء؟ ايوه عندنا ياستي وعلى الهواء مباشرة اهو شوفيه هنا مكان الازياء اللي قلتلك عليه، فينه ياسيدي ماني شايفه شي؟ اهو قدام عيونك هادي الملابس القديمة المعلقة وغير اللي مرمية على الارض شوفي كيف الزحمة وشوفي كيف الناس تبيع وتشتري ملابس اشكال والوان ومقاسات على كيف كيفك ومن جميع الماركات، هدا معرض ازياء ياسيدي الله يسامحك هادي ملابس مستعملة بيرموها او يوزعوها اصحابها وياخدوها هادول الناس ويغسلوها ويبيعوها على ناس غيرهم ملابس كلها جراثيم وميكروبات وامراض تجيب الجرب يا ستى لا تزعلي نفسك، ويكون في علمك ترى في معارض ازياء كتيرة منتشرة في البلد زي كده هدا اللي شايفاه في نهاية شارع المخزومي والتاني في سوق الصواريخ وما عندك احد لا رقابة ولا تفتيش وكلو نايم في العسل رغم انه الدكاترة والمختصين بيحذروا من لبس هادي الملابس المستعمله، ماعلينا منهم ياسيدي الحجر من الارض والدم من راسهم خلينا نلحق المكتبة عشان ناخد الملازم اللي قالت عليها فتو، تاني ملازم يا ام فتو ما يكفي ملازم الترم الاول، ايش نسوي ياسيدي بعض من المعلمين والمعلمات بيطلبوا من الطلاب والطالبات ملازم لبعض المواد يشتروها من المكتبات عشان تساعدهم في المذاكره، والشي اللي انا خايف منه انه المعلم او المعلمه ما يكون عندهم الخبرة الكافية انهم يوضحوا ويفهموا المادة للطلاب والطالبات عشان كده بيطلبوا هادي الملازم، المهم دحين سيبك من الكلام اللي لا يودي ولا يجيب وجيب الملازم من المكتبة دي قبل لا يأذن المغرب، ليه هوه في غيرها؟ ايوه في غيرها لانه بعض المعلمين والمعلمات يطلبوا من الطلاب والطالبات يجيبوا ملازم من مكاتب معينه، كمان زدتيني شوق يعني بزنس في بزنس وامسكلي واقطعلك، مالنا شغل ياسيدي انت جيب الملازم دي وخلي البنت تشوف دروسها، حاضر حجيب الملازم وامري لله بس انا عندي سؤال وابغى اجابتة بالله عليكم ياناس اليين متى حنعيش على الكتب والملازم وغيرنا عايش على اللابتوبات والسيديهات في مناهجهم ومقرراتهم الدراسية، يرضيكم هدا اللي جالس بيصير يا وزارة التعليم وعيشوا كتيييير تشوفوا كتيييير
abofatoo@hotmail.com
!