صوت الصورة

يسقي ذلوله موية معدنية
ما قال ذا الصحة ابيها لحالي
لين ياصل الماء بل ريق المطية
راعي نصوح و في الامانة مثالي
عند النبي بعيرٍ بكى من الأذية
راعيه حمله الحمول الثقالي
سعود عبدالعزيز الهزاع - نعام
اسقيتها ، والابل صارت ظمايا
اليا ضمت، تسقى وتروي ضماها
عز الله انها من خيار العطايا
عطها و هي تعطيك واقبل عطاها
الاجر لك، والاجر حسب النوايا
وان رخصت الدنيا، عرفنا غلاها!
عبدالعزيز بن مفراص المعاوي
اوجعت خشم الجمل ياصديق.
كنك تبي تفحص اسنانه.
ولا تبي تفتح اله الريق.
هذا الزمن كثرة الوانه
فارس العتيبي
الهرش باين ترى عطشان
قالوا نسقّيه بالميه
قارورة الماء من الدكان
تصنيع صحه سعودية
ونشد خشمه بليا زمام
ونصب عشر عقب ميه
عبد العزيز الصالح - القصب
رفيق وش علمك على الفحل تقصاه
تسقيه من موية الصحه بليا ضميري
ما تدري انها يا الغشيم تعدم خلاياه
حيثه سمعنا عنها علم خطيري
تضعف له الهمه وتبين خفاياه
وما عاد يصير له فعل وقت الهديري
خالد بن ناصر المخيمر - روضة سدير
رقل المطر وجفت امياه الغدير
والمي شربه زاد مع زود الحراره
والزول من قارورته اسقى البعير
ولليل أو غلاها بالصوره اشاره
واليل لها مر الزمن دور(ن) كبير
وكل مايبذل لها ما هو خساره
سعود عائش الحربي
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بما تلتقطه عدساتكم من الصور
الهادفة والطريفة .. ويا هلا ومرحبا
صورة العدد السابق