صوت الصورة

وقت التطور يبليهان حاشك
وصابك مثل بعض الأوادم نعومه
تشرب رفعت الراس يا دوب ناشك
راعيك لو مافك من ماه صومه
فهد بن عقيل الطويان - بريدة
البل تبي راعي بالأقفار سارح
ما عيشته لفّة خيوط وبباسي
بغير الصحاري ما تزين الملامح
شف منظر الحاشي عذاب ومآسي
جلعود بن لافي الشمري
يا وجد عيني على الصمّان ورياضه
أشرب غدير.. ولا أبي شرب قاروره
من أول أدوج أنا بالبر وفياضه
واليوم كلٍ يجيني ياخذ الصوره
لطيفة بنت محمد العبدالرحمن - الرياض
صحيح قالوا كل شيٍ تغيَّر
حتى البهايم صار لها شرط مسنون
والتحليه في فم هذا الحوير
ياليوسفي حده ترى الناس يشرون
عبدالمحسن بن محمد المحيسن
من بعد ما كنا على حافه الساقي
نشرب بعد ما تنتهي حزة الوجبه
صار البدل قارورةٍ شكلها راقي
من مصنعٍ في وسطها مويته صبه
نايف حمود النافع
الصبر كمل والعطش يجلب الموت
والوايت أبطى والمطرفات وقته
بلحق على حالي قبل فايت الفوت
واشرب من الصحه لو دونها العمر سقته
خالد بن ناصر المخيمر - روضة سدير
يالله ترزق عطايا الله
عن القوارير بالسيلي
بمزنةٍ من هبات الله
بالصبح أو بأول الليلي
سعود عائش الحربي - جدة
الله يسقيك يالعطشان
ويبل ريقك برشاته
من خير ربك تجي الوديان
وأبشر برزقه وخيراته
عبدالكريم عبدالرحمن السلوم
إهمال تلو إهمال ولا حدن يواليه
خوفوا من الله يا هله لا تغفلون
شوفوا البهيمه هالكه وين أهاليه
في حالةٍ يرثا لها كيف ترضون
محمد بن عبدالعزيز الخنيفر
حتى البهايم صابها بطر الأنعام
والبكره الوضحا هي أكبر دليلي
من موية الصحه تبي تشرب هيام
ما عاد تصبر كود يومٍ وليلي
حمد عبدالله الوايلي - حوطة سدير
والله وتطورت البعارين
صارت تشرب الما بقاروره
حنا هل الإبل المزايين
نشكرك يا صاحب الصوره
محمد حمد النجاشي - الخبراء
هذي بعارين الزمان التالي
تشرب الما من وسط قنينه
الله اعلم ما تبا الخلا الخالي
تبا مع البشر تسكن المدينه
عبدالرحمن الحربي - الرياض
مسكين هذا الجمل عطشان بالمره
أيضاً وعنده فشل كلوي وغيبوبه
والبيطري حذره يشرب من الحفره
تكفون خلوه يتهنى بمشروبه
صالح علي أحمد المرفدي - القطيف
بذنوب خلق الله فقدت السحابه
وصرت اتطلع لقواطي المعبات
باكر على الله ينفتح رزق بابه
وتسيل وديان وتسيل غابات
جميل المطيري
قالوا تعلّق قلت ابا علّق ولا به مضرّه
ما راسمعوني يا رجال الطيب قاصي وداني
من عقب ما شفت الحوار وفي وسط فمه جرّه
هذا زمانٍ ما على العربان مثله زماني
فهد مطر المخلفي
نرحب بمشاركاتكم حتى مساء الاثنين على الفاكس رقم 4871070 أو الإيميل الخاص بصفحة الخزامى: khozama@alriyadh.com زاوية (صوت الصورة) ونرحب بالصور التي يرسلها محبو هذه الزاوية.. ويا هلا..