صوت الصورة

يا ليت عصر الظبي ما راح
ينشاف يشرب من الخبرا
من بعد برق السماء لا لاح
وهلت مزونه وهي غدرا
عبدالله سعد السهلي - الدرعية
خزامى الصحارى من الصحراء يصورها
سبعه من الريم تشرب منقعٍ صافي
يا قانص الريم عود لا تذيرها
لعل تكثر تجيب ألوان وأصنافي
شجعان بن سعود المقاطي - الرياض
واهني اللي شرب مع هالجوازي
شربةٍ يا حلوها من صافيات
آمنات ما أزعجتهن البواري
في خلاهن واردات وصادرات
عبدالكريم عبدالرحمن السلوم - القرائن
تشرب قرير العين يا الريم ويهناك
عيشك ولا لك في فضا البيد كايد
أشرب وعين الله يا الريم ترعاك
بمحميةٍ تبهج نظر كل عايد
محمد بن عبدالعزيز التمامي - الرياض
يا غزال الريم قلي يا غزال
وين ذاك اللي من اسبابه أهيم
يشبهك يا ريم في كل الخصال
حتى اسمه من ثلاث حروف (ريم)
حاكم بن نايف بن ربيعان - نفي
صوره جميله من ذريف وفنان
غدير به يشرب ناسته من الريم
في روضة تسقى بهطال الامزان
وترعى بها شقح.. وصفر.. ومجاهيم
سعود عائش الحربي - القاهرة
يا ما حلا شوفة الغزلان
قلب المولَّع يتلنِّه
وردن على صافي الغدران
من لاهب القيض بالكنِّه
فهد بن عقيل الطويان - بريدة
غزال ياللي لك مع الشعر ميقاف
ياما خذا الشعار وصفك وحلياك
دايم مع الشعار لك زين الأوصاف
وأنا من اللي بالقوافي وصفناك
سعود بن سعد الحافي - الرياض
من بعد ما كانت اتعيش بأمن وحريه
في موطنها الأصلي وسط الصحاري تكاثر
قضو عليها أهل الجور ابخشم البندقيه
وانقذها في المحمية طيبين المآثر
ماجد عبدالعزيز الثميري - المجمعة
معذور يا اللي تطرد الصيد معذور
معذور لو قالوا ضرير وهبيله
لي سبعة أيام وأنا ألف وأدور
أرجي عساي ألقى طشاش الجميله
عبدالكريم التغيمشي - الربيعية
الصورة اللي جا بها بكر هذال
تعطيك ذكرى عن قديم الزماني
يا حلو شوف الصيد يا طيب الفال
في جو خالي ما ذكر به مباني
فايز فرحان السويلم
يشوقني عقب البطا شوف الأريام
وسط الفيافي مع سهلها وعرها
يشوقني حب الوفا شوق وهيام
وأزرع لها الأشواق وأجني ثمرها
ماجد أحمد عبدالله الثميري - المجمعة
صبح المطر والسيل فوق المشاريف
مجموعة الغزلان صارت تشافي
شفت الغزال اللي له سنين ماشيف
يشرب من الغدران والجو صافي
عقلا خزن العنزي - تبوك
طول غزلان على الماء وارده
وكل ريم مشفي يروي ضماه
عين للماء والأخرى ترقب شارده
منوة القناص في أرضٍ نفاه
حمد عبدالله الوايلي - حوطة سدير
يا ماحلا منظر الغزلان
على الغدير يوم يردنه
يا لله يا مجري الوديان
يا منبت العشب يرعنه
خالد الطيار - الزلفي
يا الله يا اللي مدبر الكون تدبير
يا والي القدره عليك اتكالي
ستٍ من الغزلان جنب الغدير
غديرهن بين السهل والجبالي
دامغ الدامغ - روضة سدير
عقب الحماية غزال الريم
كثر وتناسل بمحميات
يشرب غديراً ملاه الديم
ما وضّح أرضه هل الكشتات
سعود بن عبدالعزيز الهزاع - نعام
نستقبل مشاركاتكم الشعرية حتى مساء الاثنين على الفاكس رقم: 4871070أو الإيميل: khozama@alriyadh.com الخاص بصفحة (الخزامى) زاوية (صوت الصورة).. ويا هلا.