صوت الصورة

وردن على الما والحوير حدنّه
جسمه صغير ولا قدر يدحم الحوض
الحوض ضيق والنياق ازحمنّه
بس الحوير صار مبعد ومرفوض
عقلا خزن -
تبوك
البل تشرب من حياضٍ صغيره
ليته على عدٍ وسيعٍ مجاريه
الناس تفرح في وجوهٍ سفيره
لجل الزياره كل شيٍ تراعيه
علي الرشيد -
رياض الخبراء
الراعي اللي حط قدره وخلاه
جتله نياق ومسحت كل مافيه
واحد وقف طابور .. والدور ماجاه
أربع جماجم داخل القدر .. كافيه
سعد الحمآد - روضة سدير
صورة العدد السابق
من عقب ماهي على هداج
تارد وتروى من زلاله
يوم المطر فوقها ثجاج
تشبع ولو وثّق عقاله
عبدالله بن لافي -
الرياض
علط الرقاب مهرجعات الحنين
قامت تداحم وارداتٍ ظمايا
والبل لها حبٍ قديم من سنين
مبطي غلاها عند أهلها مطايا
حمد عبدالله الوايلي -
حوطة سدير
يا حيّ ذا الشوف يا حيّه
هذي عطايا من الرحمن
غلاها واجد ما هو شويّه
يرخص لها غالي الاثمان
عبدالله بن عبود السهلي
- تبوك
البل وردت ما لقت من يواليه
وردت على قدر ما يكفي حداها
بهيمةٍ يا صاحبي لا تخليه
تحتاج لها أحواض والما نماها
محمد عبد العزيز الخنيفر
- أشيقر
أرون عطش أبي من الورد قرطوع
خلن لي الفرصة ترى حشاي عطشى
للما مناسيمٍ تقاطن له نجوع
ننصاه لو هو في رحيلٍ وممشى
سالم معزي الفهيقي
- تيماء
جت الركايب من العطش تارد الحوض
لو هو صغيرٍ ما يكفي البعارين
أطلق سراح النوق ترعى من الروض
وتشرب غديرٍ صافيٍ يبهج العين
سعود بن عبدالعزيز الهزاع
- نعام
البل عطاشا والماعون حجمه صغير
والحر كايد والعطش ما له حلول
قامت تزاحم شعلها والمغاتير
تبي تبل الريق والحال معلول
والراعي المسكين قلبه كما الطير
الوايت أبطأ وأصبح البال مشغول
خالد بن ناصر المخميمر
- روضة سدير
عز الله إنك يوم صورت أبدعت
صورت له صوره ولا في الخيالي
وبنقولك صورت واتقنت لاهنت
ضبطت ها الصوره على كل حالي
سعد سلطان السهلي
- المجمعة
يالله يا مسقي العطشان
تروي ذلولي مع الحيران
الصيف جا ويبست الغدران
والبل وردت على الحيضان
عبدالكريم عبدالرحمن السلّوم
- القرائن
تزاحمن أربع من البل على الحوض
الحوض ضيق والضعيف أبعدنه
يالله تسقيهن لما يخضر الروض
ويشربن من وقعه أو يقصدنه
سعود عائش الحربي
الربع مغاتير والخامس وراهن
والوقت حاديهن على حوض تاير
والحوض ضيّق ضنتي ما كفاهن
وين أنت يا رعي أذود صاير
عواض بن مطرود الشمري - حائل
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم