وتبقى تفاصيل الوصل ماتبيني

يااللي تفنّن في غيابك من ازمان
يااللي توصّى في تباريح عيني
يااللي تنادي ل اعذب الماي عطشان
ثم تمنعه يشرب وفعلك مهيني ؟!
يبست معاليق الغلا وانت مندان
جريمتك يا كبرها يا خديني
ترا الوصل للحب سيره وعنوان
قلي متى تترك رداك وتجيني ؟!
صارت مسافات الألم .. حب خلان
وضاعت عناوين الأمل في سنيني
ليل الشقا في صحبتي دوم سهران
وجمرة غيابك شبّها البعد فيني
وجابت هواجيس السهر رمح وسنان
حروبها ف الليل زادت ونيني
تبكي جروحي في رجا صلح((نسيان))
مير الهوى يرفض ويرفض كنيني
وتبدى صراعات العنا فيّ ويبان
حبي ، وشوقي لك، ويبدى حنيني
لين الهجر يجلب تعابير الاحزان
وتبقى تفاصيل الوصل ما تبيني ؟!
أحمد بن محمد التميمي - سدير