يا جماعة خير كم طال الصبر شفت أنا الموقف ترى أصبح خطير

صوت الصورة

يا جماعة خير كم طال الصبر
شفت أنا الموقف ترى أصبح خطير
شيٍ غريب اليوم شفته يا بشر
الحلال يضيع وهذا ما يصير
الوحوش تجيه وأصبح في خطر
صار ينقص هذا أمرٍ محير
وخفت أنا يا ناس لا يروح العمر
ورميت الضبع هذا الوحش الشرير
محمد عبدالعزيز الخنيفر - أشيقر
ياهل القنص وشفيكم اليوم تخطون
مقناصكم ضبعٍ على الخلف مربوط
يالضبع الاشهب كيف صادوك وشلون
وانته طليق حر ما تقرب خطوط
يا راعي الجيب الربع هد بالهون
ترى عقابك واجب اليوم مشروط
يومك ذبحت الضبع مخطي ومديون
فعلك شنيع وما يسويه معبوط
حمد عبدالله الوايلي - حوطة سدير
قناصةٍ في البر وسط الصحاري
ما بين ضلعانٍ .. وما بين شعبان
تفاخروا بالصيد صبح وعصاري
وما حصلوا يا كود تعليق ضبعان
الضبع نادر ومحمي المكاني
ولا لكم ياخ وك في صيدته شان
ان كان ما فالقنص فرخ الحباري
فلا لنا فالقنص غايه ولاشان
هيفاء بنت طلال التميمي - سدير
يا صورةٍ للناس يا مكشوفه
لاهيب لا عفري ولا ريميّه
جيب وضبع وبندقٍ شاخوفه
والسر ورى اللوحه المخفيه
نشوف شوفه والملأ تشوفه
والظاهر ان مصوره دُوريه
شجعان سعود العتيبي - الرياض
الضبع مربوطٍ على الجيب بحبال
والبندق اللي جهزوه المفاليح
ما ادري وراه مخفي رقمه وذال
والناس ما تقنص بلا فسح تصريح
ان كان هو خالف ووقت الحظر زال
يأخذ من الموقف دراسة وتلميح
علي رشيد الرشيد - رياض الخبراء
زودٍ على ذبحه تمثلت بالذيب
ومعلقه بالخلف والربع ماشي
فوقه سلاح الصيد عذبه تعذيب
ليتك تركته في جبال وعاشي
ومغطي اللوحه يا كثر العذاريب
وراك ماغطيت ذيبك بشاشي
عبدالمحسن محمد المحيسن - رياض الخبراء
اللي معلّق في قفى الجيب مربوط
رأسه اضنه رأس ريم الصحاري
وجسمه طبيعه كله ألوان وخطوط
جابوه بالبارود من أرض الخباري
سلاحٍ جديد الصنع والجيب مخروط
يجوب بران الخلا في الغداري
سعود عبدالعزيز الهزاع - نعام
الحلال اللي بها اليوم اختفى
أغلبه روح ثم راح الحصيل
جيت للشاوي وقال إنه سهى
وما بقى لي شي وأعطوني الدليل
يا رفيق الخير .. يا راعي الوفا
لا تخلي الوحش وانهض لا يعيل
طال صبرك ما مضى قلنا كفا
والخطر رده وخل دمه يسيل
ريان محمد الخنيفر - الرياض
تسلم لنا يا راعي الجيب وتعيش
من شاف شكل الضبع زاد ابتهاجه
خطراً على الرعيان أيضا المطاريش
وخوّف بيوت الناس.. زايد زعاجه
خالد ناصر المخيمر - روضة سدير
راع الرّبع ناوي المكشات
يمّ الديار الجنوبيّه
والضبع صاده بطلقات
من بندق الصيد ناريّه
عبدالكريم عبدالرحمن السلّوم - القرائن
صيدتك جزله وبندقٍ جنب القزاز
شوفوا الضبع مربوط بأعلى يديه
ويا ماشيٍ من وين ودّك بالحجاز
ليا شفت سوق عكاظ مربنا عليه
بدر الحزيمي
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق