عواكيس

*عزيزي معوكس: وش ذا حارس الشباب وليد عبدالله مامدانا نمدحه الا وتسبب في هدف ماله داعي وقضى على كل آمال فريقه ياترى وش جاه ابوخالد على الله يعوض مع المنتخب ويرجع بالكاس؟
الشبابي -عبودي
- شكل أخويانه مقلبوه وغيروا الإستراحة!
*ابو العواكيس والله وسواها الزعيم وأنتفض الأسد الازرق وزأر وأكل النمور والله قايل لربعي لا أحد يستفز الهلال ترى ياويله؟
نواف الصيخان-حي الفلاح
- ولعها وأكلهم حبه..حبه!
*صاحب المليون رساله معوكس.. مشتاقين ياصديقي أشوف مدرب المنتخب كوزمين ضم ابراهيم غالب على الرغم من أن أصبعه في الجبس يعني تتوقع يمديه يطيب قبل الآسيوية؟
عبدالعزيز السعد-الرياض
- يمديه.. وبعدين أصبع يومين ويطيب وأن بغى يصك بلوت في النايب وصديقه!
*الناقد الساخر ابو العواكيس تكفى جاوبني بصراحة الأكيد انك مؤرخ وعندك معلومات الحكم اللي طنش ركلة جزاء للهلال قدام هجر صحيح أنه ابن حكم سابق واسمه على أسم مهاجم فريقه المفضل؟
بندر العصاي-عنيزه
-عاد هو بالحاله يامالك من الخير أنت ماشفت الكلاسيكو؟!
*هلا معوكس ..هلا باللي شايف نفسه علينا ومايعطينا وجه مرة نشوف المشاركة ومرة ولافي كور لافة وانا ماغير انتظر كل سبت واعتبر الزاوية وجبة دسمة؟
حمد الدوسري-أبومبارك-العزيزيه
- حلوه وجبة دسمة مثلوثة ولامندي؟!
*عزيزي معوكس: أقول سلم لي على الحكم الاجنبي اللي صاد الممثل سباح الثمانية عشر اللي اذا طاح قلنا الله يبيحه ويحلله وكلها ثواني ويقوم مثل الحصان؟
بدر العلي-الخبر
- شويه مثل الحصان الا كنه نفاثه ماتشوف الا دخانها!
*الصديق الوفي خفيف الدم معوكس
- ودي أشوفك مقدم أو حتى ضيف في بعض البرامج الاجتماعية وخاصة عن زواج المسيار عندي احساس إن في جعبتك شي وعندك كلام ودك تقوله ولاخايف من المدام ياجبان
أحمد الحمد-بريده
-مافي جعبتي الا الدجة ويبي لي استديو تحليلي بمشاركة الشنيف وعبدالجواد!
*الشهير الكبير معوكس الا تلاحظ أن التحكيم المحلي سبب كوارث خاصة للهلال انت ماشفت السلطان والناصر يعني النقاط الثلاث راحت بسببهم ولاحس ولاخبر من اللجنة
عادل المطيري-المدينه المنورة
- المشكله كلها اصلا في اللجنة اللي ماعندها نيه تطور!
*عزيزي معوكس: قل لي بصراحة وش رايك في نايف هزازي كمحلل مايذكرك بشتالي ومحمد حمادة وظنك يطيعونه الشبابيين يستمر ولا علشانه موقوف.
عاشق الليث-الرياض
- انا ماشفت الا دعاية كرفتة وساعة!
الحبيب ابوالعواكيس: تكفى قدم نصيحة لمهاجم الهلال سالم الدوسري ماتشوف أن مستواه مرة نازل وكنه يلعب بلحاله انانية وفردية وبرايك وش حله..
علي الصالح-القصيم
- حله يودونه الاولمبي الين يعرف الله حق ويضبط اموره ميسي!
*عزيزي معوكس وبعدين مع فريقنا وحبيبنا العميد في الدوري بعيد عن المنافسة وطلع من كاس ولي العهد ومابقى له الا كاس الابطال ينافس عليه بشرط نشوف جديد في الآسيوية؟
محمد القرني-جدة
- اكيد تبي تشوف جديد وتشوف المولد وهو منفرد مايرده الا الكورنيش!
*الساخر عكوسي أشوف بعض الإداريين عودوا مع الفريق على الدكة يالله فال خير وينه من زمان يوم اللاعبين بحاجته ووين النايب؟
مشعل العتيبي-الرياض
- واحد مشغول بصكة البلوت !
*يابوالعواكيس ياساحر قلوب الناس وعشاقك كثر قلي هل انت متفائل بمسيرة الاخضر في الآسيويه خاصة عقب حضور كوزمين ولا الدعوى مدبرة مثل دورة الخليج مع طيب الذكر لوبيز..
سطام العازمي-حفرالباطن
- كوزمين ماعنده يكفي أنه ورى المسابقات العين الحمراء !
*أحلى ناقد ساخر ابوالعواكيس متى تحس إن فيه فوضى في الوسط والاعلام الرياضي وتشوف إن بعض المحسوبين فشلونا قدام اللي يسوى واللي مايسوى ولابد من قرارات رادعة وحزم؟
ماجد العمار-حي الروضة
- حزم ولا الطائي عزالله فشلونا ذا المهبل اللي يطامرون في القنوات ويغردون بعبارات كلها تعصب!