عواكيس

* عزيزي معوكس وش تتوقع صار في اجتماع اتحاد الكرة ألغوا عقد لوبيز ولا استقالوا ولا كلن صلح سيارته؟
مازن السيد - جدة
- كلن فق أثمه ومافي يده شي!
* صاحب المليون رسالة ابوالعواكيس ودي أعرف وش يبي ذا المعتزل والمطرود من ناديه والقناة وماغير يتسول في قنوات خارجية؟
عبدالله السعيد - الرياض
- يبيهم يرشحونه لرئاسة اتحاد الكره ولا الاتحاد الآسيوي!
* الحبيب معوكس أشتقنا لك ياعكوس تعالا ..تعالا ياعكوس وش قصة الليث فاز على الهلال وبعدها دحدر إيقافات وطرد وخساير مع الداهيه ستامب؟
الشبابي عبودي - حي الياسمين
- من يوم راح القدح واللي يقدح من راسه والدعوى لك عليها!
* قاهرهم وحابس دمهم ابوالعواكيس واخيرا أسدل الستار على مسرحية عمر هوساوي والبند الخاص اللي يخوله باللعب لأي فريق؟
نواف السالم - الخرج
- أي فريق او اي سعادة اللواء ماله الامندي العريجاء!
* خفيف الدم معوكس تدري أني أنتظر يوم السبت علشانك ياخي انت رهيب وعليك ذبات والله يعين اللي يحتك فيك شكلك تبي تنبرش عليه؟
مشعل العامر- الخبر
- اكيد ولايرده الا عيادة باسكال!
* هلا معوكس معقوله الهلال بدون إدارة والعابه من جرف لدحديره يعني والنهاية؟
عبدالعزيز السعد - حي الشفاء
- النهاية طلعة القدية!
* الغالي معوكس وش أخبار لجنة التوثيق ماعاد لها حس ولاخبر ظنك يلغونها ولا وش القصه؟
نادر الدوسري - الافلاج
- شكل الجماعة مشغولين بأكبر !
*الصديق الوفي ابوالعواكيس يقول الخبير تعليقا على مواجهة اللجنة الاولمبية واتحاد الكرة انا عندي الحل انت وش رايك؟
محمد سفران - القصيم
- اقول الله يخلف عليه وعلى حلوله وأحسن له يخليها للتوثيق!
* عزيزي معوكس وش رايك بالاستديو التحليلي أشوفهم تطوروا المحلل يوقف ويشرح على السبوره تكفى قلي وش كن المحلل؟
مساعد الحربي - الرياض
- كنه مدرس ليلي!
*مرحبا الف الخبير معوكس تكفى شف لنا حل مع ريجي والله ذبحنا ونرفزنا لاخطة ولاتكتيك وفوقها العلة ولد خالته بينتلي ياليت اسمه غير وين مستواه وقيمة البينتلي فرق كبير؟
جمال الفهد - سدير
- ريجي كلها مباراتين اما انه يضبط الأمور ولا على بوخارست وديني!
* عزيزي معوكس: اقول يازين عنابي سدير السنة ذي غير خطف نقطتين من الاهلي والنصر تتوقع انه يستمر في التألق ياصديقي؟
علي الناصر - حرمه
- يستمر وش يرده وفاله الصدارة!
* الخبير الساخر معوكس: ماادري ابوالعواكيس لك في الطبخ على الأقل تصرف وتخدم روحك لاصرت عزابي او كاشت في البر؟
ندى العلي - عنيزة
- اكيد لي وابشرك أضبط المثلوثة والجريش!
* يامعوكس وش ذا البرد ياخوي جمدنا والفرا غاليه والحطب انت عارف ممنوع وش الدبرة؟
حمد الدوسري - ابومبارك - العزيزية
- عليك بالدفاية الصيني تلقاها عند ابوريالين!
* الاخ معوكس: وش رايك في العميد مع بيترويكا ماتلاحظ أنه تحسن؟
عاشق العميد - سامر عبدالله
- الجايات تبين ياسامر!
*الساخر ابوالعواكيس أشوف في اتحاد ما النايب قلب على الريس وقام يبارك خطوات التعديل المقبلة صحيح يادنيا شفنا في أحوالك عجب فيكي الثمين مسكين يرخص لو إنه ذهب؟
بندر العصاي - عنيزة
- ياحبيبي كلن يدور مصيلحته واللي تكسب به العب بالساحة!
* يامعوكس وش ذا المحلل اللي يقول عند بداية الشوط الثاني اتوقع يسجل فريق(...) ان شاء الله وين الحياد؟
خالد العازمي - حفر الباطن
- الحياد يسلم عليك يخلف الله عليه لاتحليل ولاتعليق ولايهون تخبيص بعض الحكام!
* عزيزي معوكس متى نشوف برامج رياضية متميزة وتثقف ولافيها متعصبين ومهايطية فشلونا قدام الضيوف واللي يتابعون الرياضة يعني مافي هالبلد الا ذا الولد فكونا ياناس؟
وليد المطيري - الرياض
- ماكو فكه الدعوى كلها مسرحيات كوميدية وماكلن يجيد الدور ويضحك !