عواكيس

*المبدع دوما معوكس: كل عام وأنت بخير يالغالي ومن طول الغيبات جاب الغنايم وبودي أن أسألك شفت "الاخضر" لا لعب وش رأيك في مستواه بصراحتك المعهودة؟
محمد السلمان-السويدي
- شفته لالعب ومال الجمهور إلا التعب !
*صاحب المليون رسالة ابوالعواكيس: ودي تعطيني رأيك في لجنة التوثيق واختيارها لهذا العدد الكبير من الإعلاميين وطلبها تقديم ورقة عمل وش الخربطة ماصارت والله لو انه أختبار على وظايف شاغرة؟
بندر العصاي-عنيزة
- شكلهم بيسلمون الاوراق بيضاء والنتيجه صفر مكعب!
*قاهرهم وحابس دمهم معوكس: ليه بعض رؤساء الأندية طايحين هجوم على مدرب المنتخب لوبيز اقول الله يالدنيا وين قوة وشخصية اتحاد الكرة اللي أول مايتجرأ أحد يخربط ويشوشر على منتخب الوطن؟
على الحربي-المدينة
- الأول تحول يابوحسين ومن أمن العقوبه وعليك الباقي!
*عزيزي معوكس ماتشوف اننا في زمن غريب وكرة القدم في خطر والاختيارات في اللجان والانتقاء غريب ويصب في مصلحة طرف واحد ولا وش رأيك؟
بندر السليمان-الزلفي
- ابد.. صح لسانك وفالك الطقم الكحلي!
*الاملح والاجمل الظريف خفيف الدم معوكس وش قصة اللاعب عبدالعزيز الجبرين ضجة وطقاق وآخرتها ولا في الاحتياط تتوقع يرجع الفترة الجاية للرائد ويتنازلون عن باقي المستحقات؟
ريان السعدون-حايل
- اما يرجع ياكودها ماعنده الا الأمل يونايتد ولا البدايع!
*عزيزي معوكس ياخوي وين الحياد عن ذا البرامج الرياضية الفضائية اللي يعدها ويقدمها مشجعين وماغير مهايط وماهمهم الا الدفاع عن فريقهم والدليل موضوع (الفيفا) عن بطولة كأس العالم غير المعترف بها شكل المذيع ذيك الليلة مانام وأشغل ربعه بالجوال يبي الإنقاذ؟
مشعل العتيبي-الرياض
- شوية أشغلهم يقولون البطارية احترقت من كثر البربرة!
*الغالي ابوالعواكيس معقوله ياصديقي المتحدث باسم اتحاد الكرة ماشاف تغريدات عضو لجنة التوثيق اللي تفشل وكلها تعصب؟
عبدالله بن علي-حي الشفاء
-شايفها ويدري عنها زين وموبايلي!
*الاخ العزيز معوكس ماتلاحظ معي أن الهلال بحاجه لمهاجم أجنبي مع ناصر الشمراني يعني لوأصيب ناصر لاقدر الله من البديل؟
معاذ الحميد-مرات
- مااحد يضمنها مع ريجي الا ابوسعود عزيز شكل واسطته صعبه قوية!
*عزيزي معوكس: وش رايك بلاعب الشعله برج معوضه ماتلاحظ انه جوكر ومكسب لكل فريق لولا خشونته..
سعد التميمي-الخرج
-انا ما اعرف الا برج الشنانه!
*الساحر معوكس: جاوبني عن رأيك باغرب هدف شفته في حياتك الرياضية؟
عبدالعزيز المعيلي-الرياض
- ماغيره هدف التعاون في الشعله الكورة رايحه برا وطب عليها بفدائية الحارس وقدمها احلى هديه لابوخميس!
*الحبيب الغالي ابوالعواكيس انت شفت الموثق اياه يصنف البطولات وفق ثقافته ماادري نسى موقعة الجمل التاريخية ويد هادي واختها يد دلهوم وغيره وغيره؟
احمد الحمد-بريده
- عسى مانتاب هو جوه الهوامير اللي بيخلونه صفر على الشمال خبير الغفلة!
*عزيزي معوكس أشهر كاتب ساخر واللي ننتظر زاويته كل سبت على أحر من الجمر ممكن تقول لي بصراحة عندك حساب على التويتر ولافيه أحد منتحل شخصيتك؟
عاشقة الموج الأزرق-القصيم
-لاعندي حساب ولاجغرافيا واللي منتحل شخصيتي كلها مسألة وقت وأجره على جبهته في المحكمة!
*معوكس الصديق الوفي هل تؤيد من هاجم لوبيز وإدارة المنتخب خاصة في موضوع حسن معاذ ولا الدعوى ولم العصابة قبل الفلقه ومسلمين بالخسارة ويجهزون تبرير؟
نايف القحطاني-الخبر
- تبرير حسب الفريق المقابل!
*عزيزي معوكس ياخي وش ذا البربسه في الحزم ود يوسف عنبر جب يوسف عنبر وبعدين هم مايعرفون أمكانيات علي كميخ يوم يتعاقون معه وبعدين يصرفونه؟
حزماوي صميم -الرس
- صرفوه وصار من حظ بايرن ميونخ!