عواكيس

الاخ العزيز معوكس: شفت الاستقبال للمدرب الهلالي في المطار
كيف الموظف يسحب المدرب، ابي تعليق منك حلو ؟
صديقك معاذالحميد - مرات
-والله ماباقي الا يستعينون بسطحة بعض الناس!
* العزيز معوكس وش رأيك باللي يتحدث عن ارقام بعض اللاعبين واذا جئنا للوثائق ما نجدها فقد هم يرددونها في مقالاتهم وعبر منابرهم الاعلامية.. افدنا؟
راشد الدوسري- الخبر
-عاد انت وش حارق رزقك مثلها مثل البطولات اللي كنها ارانب تولد بالعشرات!
* حبيبنا وصديقنا معوكس معقولة دورنا في المونديال الفرجة.. وين المنتخب ووين الحكام مالهم شوفه؟
بدر العبدالله- الجوف
-مشغولين بجدول الدوري والفرح برحيل القادح!
* المثير معوكس يعني الجابر خرج، والبعض استغل الفرصة ماصدق وقام يشخص قدام وسائل الاعلام، يعني كل هذا عشان يقنعنا ان سامي وراء منع ظهوره؟
خالد الرشيد- الرياض
-الجابر بطل ويكفي انه شاغل الناس وبعض المهبل اللي انضغطوا بسبته!
* الحبيب معوكس متى يقولون انك شرفي فعال في أحد الاندية وانك تقدم دعم سنوي مفتوح .. انتبه لاتنشق الميزانية وتروح فيها؟
سعد الفهد- عرعر
-اما ذا الشرفيين بعضهم ماعنده الا اللقافه والبربرة والمهم شوفوني!
*الحبيب الغالي معوكس
تحية طيبة وبعد:
ياترى يابوالعواكيس حمد الحمد توأم يحيى الشهري أشتاق له ولا سمع عن العريجاء واجوائها الجميلة والمولات اللي في كل شارع وسكة
حمد الدوسري-ابومبارك -حي العزيزية
-اما اجواؤها الجميلة والحر هاليومين يخليك بروستد!
*قاهرهم وحابس دمهم ابوالعواكيس
تحية محبة وبعد:
شفت سعيد العويران طلع رجال وعرى ذا المتعصبين اللي قالوا إن تقرير الايطالية اللي عن سامي الجابر اصلا هو عن سعيد ياخي ذولا مافيه أمل يعقلون وش حلهم
بندر العصاي-عنيزة
-حلهم الكوي مع العلبات ويامسافر على الطايف طريق شهار!
*صاحب المليون رسالة ابوالعواكيس
تحية طيبة وبعد:
ياخي معقولة منسق عمل اللجنة الخاصة بتقييم عمل لجان اتحاد الكرة عضو مجلس ادارة أحد الأندية
رامي العلي-جدة
-منسق هنا ومقيم هناك وقولوا للغالي قولوا له وشو له جدول وشوله!
*خفيف الدم الأشهر والأملح عكوسي
تحية طيبة وبعد:
أشوف من خلال خفة دمك وموهبتك أنك تصلح ممثل في مسلسلة بدوية يعني يافليحان يامكاري وش تختار
عاشقة الموج الأزرق
-ماغيرة مكاري علشان أسقي هلالة من البير ياعونك!
*عزيزي معوكس
تحية طيبة وبعد:
ياخوي وش ذا القصة للعابد في دبي ياعيباه وين الحياء ليته يترك عنه ذا الخرابيط ويركز على تطوير مستواه اللي الموسم الماضي ماكنه موجود.
عبدالعزيز السعد - الشفاء
- ولاموجود أكسترا!
*الاستاذ معوكس
تحية وبعد:
ابارك لك النجاح اذا مازلت طالب وعندي أحساس انك مغرز وتسقط كل سنة انت قلي كيف اساعدك ترى لي واسطة بالجامعة يعني وش تحتاج.
احمد الحمد-بريدة
-دفع رباعي مثل ماحصل لبعض....!!
*الدكتور معوكس أخبارك بشر عنك تكفى لا تسحب علي وجاوب بصراحة جربت في حياتك الحب
عبدالله القرني-الدمام
-لا الفستق!
*الخبير ابوالعواكيس
تحية طيبة وبعد:
برايك صحيح المدرب ستامب غادر الهلال وحمد الحمد وقع بأمر المدرب الجديد الروماني ريجي كام ولا مثل العادة لزقوها في ظهره.
نواف الصيخان-حي الفلاح
-لزقوها في جبهته!
*العزيز معوكس
تحية طيبة وبعد:
هل لديك خبرة رياضية ساعدتك على البروز اعلاميا بمعنى هل كنت لاعب كرة سابق وفي أي مركز كنت تلعب ولو مازلت تلعب كم تتوقع قيمة عقدك.
علي الصالح-الرس
-عد واغلط اما المركز فلعب فيه التايب والثنيان يعني امرر باص عيون والفطور في المعسكر بيض عيون وشكشوكة!
حمد الحمد