عواكيس

الحبيب معوكس: السلام عليكم اهنئك على هذا المستوى المتألق على مر السنين ومازال القراء معجبون بك وانا اول القائمة؟.
صديقك معاذ الحميد - مرات
- أنت اول القائمة وينافسك صحن قايم!
* عزيزي معوكس: مارأيك بوضع الهلال حالياً؟
على الناصر- حي الشفاء
- بيض الوجه وماقصر بالخطة 2000، والله يعين بعض الناس على الضغط!
* الأخ معوكس: هل تعتقد أن النصر أصابته عين والدليل أنه بدأ بإحضار رجيع الأندية مثل مدربه كانيدا؟!
سفير الحلة - الخبراء
- وانت الصادق يعالج اللي صابتهم العين!
* الأخ ابو العواكيس: انا عندي احساس انك بتتوقف او تشطب من الرياضة لأني ملاحظ عليك انك توزع التهم هنا وهناك وتعتقد أن ما فيه رادع؟
صديقك-ابوحسين
- القامات ماتنحني وانا أقدح من رأسي يا بوحسين!
* ابوالعواكيس: أشوف النصر قام يضيف من ذا اللاعبين ياترى هو بحاجتهم ولا وش السالفة؟
عاشق العالمي-سطام
- السالفة تجميع مثل الأسهم الين أخبقت!
*خفيف الدم والظل والساخر الكبير معوكس: أشوف الهليل يحاول يحتك بك مسوي له كاركتير واحد وده يعرف انت مين وشخصيتك شكله يمون وبينكم علاقة غير طبيعية وتجمعكم خفة الدم؟
عاشقة الموج الازرق-القصيم
- أكيد يمون والعشرة الحلوة على الرأس والعين والشارقة!
*ابوالعواكيس: وش ظنك أحد المذيعين اللي كنه حزمة «الخوص» ماينشد به تتوقع ليلة بيونديكور مع سامي مرت عليه على خير ولا ياهي ليلة حزينة؟
بندر العصاي -عنيزة
-الا حزينة ودبلة كبد ولقطة الختام انا المسيكينه انا!
*البارع الفنان ابو العواكيس: وش رأيك في نتائج منتخب الكرة الشاطئية يقولون أنه ودع ولقم من المغرب بتسعة؟
عبدالعزيز السعد- الرياض
-اصلا مادرينا انه شارك.. ندري انه ودع الله يفشلهم على ذا النتيجة اللي كنها كرة يد!
*عزيزي معوكس: انا ودي أعرف ليه رئيس الهلال أعلن عن اجتماع مع أعضاء الشرف لمناقشة استمرار سامي الجابر والنتائج روعة يعني مايبون الفريق يستقر ويواصل والا وش القصة؟
نواف الصيخان- حي الفلاح
- والله هذي اللي ماحدن فهمها وكنها لغز في مضارب البادية!
* الغالي معوكس: يا أخي انت رهيب وزاويتك رهيبة تكفى لاتوقف وتخلينا انت قليل مثلك أشوفك فريد؟
أحمد الحمد - بريدة
- أيهم فريد شوقي ولا الاطرش؟
*المبدع ابو العواكيس: اشوف هناك مفارقة عجيبة وفسرها على كيفك على قد الهلال مايلقاها من بعض النصراويين والاتحاديين اللي مطبوعة ريسهم هجوم على الهلال ليل نهار الا ان ردة الفعل مكافآت من أعضاء شرف الهلال وتكريم وش تفسرها يامعوكس؟
علي الصالح
-أشوفها شهامة وكرم وكلن على مبداة وطبعه!
* الاستاذ معوكس: هل صحيح أن الشبابيين صرفوا النظر عن الخيبري وعلشان كذا وقع للنصر؟
الشبابي -عبودي
- شكلهم أحسبوها أن جو الرياض مثلك عارف غبار والشبابيك مقفلة!
*المحامي الممتع معوكس: هناك من قلل من فوز الهلال على بيونديكور الاوزبكي وجدارته بالتأهل بحجة أنه ضعيف فنيا أنت وش رايك؟
سعد الدوسري-الرياض
- بحجة ولا بجحة اللي مايطول العنب يقول عنه حامض والمحلي جعله يولي!
*الناقد الظريف معوكس: أشوف أنك تطول علينا على هالشكل نبيك يومي او كل يومين حرام تطول ونقول لك هلا يامطول الغيبة؟
أبراهيم بن علي -الدرعية
-أبشر يابونورة ندرس الامر ونستعين بلجنة اتحاد الكرة اللي تناقش عمل الانضباط والتحكيم والدعوى كلها محسوبيات وصداقات!
*ألاستاذ معوكس: ليه الشباب الليث خسر من الاتحاد وطلع من الآسيوية بذا السهولة وين الروح والمستوى اللي شفناه في النهائي قدام الاهلي؟
خالد المطيري - تبوك
- يارجال زين انها انتهت ثلاثة ماقدموا شي ماغير يسحبون رجليهم لا ولا الرباعي الاجنبي اللي مكلفين النادي ملايين وماقدحوا!