عواكيس

* الغالي ابوالعواكيس تحية بعد الاحداث الاخيرة برأيك وش التنظيم المناسب اثناء دخول الحكام للملعب؟
بندر العصاي-عنيزه
- يمرون من جهاز خاص لكشف (العجراء)!
* قاهرهم وحابس دمهم معوكس يأخي معقوله (العالمي) يوقع مع خالد عزيز انا اشوف انه مقلب وبعدين وش مصير الشباب شايع شراحيلي وعبدالمحسن العسيري وغيره من نجوم النصر
مناور الحربي-الرياض
- مصيرهم للشعيب ولا منتخب سدير!
* الحبيب معوكس الظاهر أن فيه لجنة كنها حارة كل من أيده اله غوار الطوشة شكله يقول اذا اردنا ان نعرف لماذا لم يعاقب الهلال باللعب بدون جمهور حسب تحذيرهم السابق وش كمالتها يامعوكس؟
حمد الدوسري-ابومبارك-العزيزيه
-كمالتها علينا أن نعرف مباراة الفريق المقبله امام من؟!
* عزيزي معوكس لماذا لم تعاقب لجنة الانضباط حسين عبد الغني هم مايشوفون الدم اللي نزف من مطيري الفيصلي كيف حسينوه طلع منها؟
عبدالملك المرشد- عرقه
- طلع منها زي الشعره من المطبق!
* الحبيب ابو العواكيس وش سالفة بعض الحكام صار شوفهم شجر يآخي هدف عينك عينك باليد معقولة مايشوفونه برأيك الحل؟
نواف الصيخان-حي الفلاح
- الحل يعطونهم درابيل ولا يحولونهم على مرور دلة!
* الشهير معوكس تحية وبعد وش بلى الهلال الاجانب في المغرب واسامة هوساوي واحمد الفريدي قالبينها حراج بالله على ذا الوضع الهلال بينافس على الآسيوية؟
عاشق الزعيم-عبدالرحمن العمار-شقراء
- أنس يابوالشباب ولاحتى الخليجية في زعبيل!
* الاخ معوكس زمن النجوم عيال عطيف راح علي للرائد وعبده للاتحاد صراحه ماني مصدق واخاف بكرا يلحقهم احمد وعبدالله وصقر؟
الشبابي-عبودي
- يمقن يلحقونهم ويمقن لا!!
* معوكس ماتشوف أن مساء الرياضية صار بدون هدف وأي طرح ايجابي ماغير صياح وازعاج كنه حراج؟
هاني العنزي-الرياض
-حراج الصواريخ!!
* الساخر معوكس وشلون احد الحكام ظهر في استضافة فضائية وين قرارات ابومهنا وشدته ولا ماغير على الضعوف
احمد العلي-البدائع
- خايف من العجراء تنزل على راسه!
* الديب معوكس ماتشوف ان الفريدي زودها وبهالسرعه قلب على الهلال؟
فهد السلطان-الروضة
- قلب حشا ..حمامه!
* العزيز معوكس يقولون ان هناك من يخفي وراء (ابتسامته الصفراء) اشياء لاتعكس ما في داخله لذلك هو يتحيّن الفرص للاساءة الى الاندية المنافسة ويحاول تغطية مشاكل فريقه؟
عبدالله التميمي- الرياض
اهم شيء ايجار الشقة وما يتكلف الاخبار تأتيه اول بأول من الغرف المغلقة!
* عزيزي المحترم معوكس لجنة الانضباط تأخذ فلوس من الانديه واللاعبين والاداريين كأنها (ساهر) وين تروح له هالفلوس؟
عبدالله ا لحميد-مرات
- علمي علمك
* من الصحفي الذي تثق بطرحه يامعوكس ومن المذيع الذي ترى فيه القدرة على كبح ميوله وتقديم عمل مهني يرضي المشاهد؟
حمود الدهمشي- عرعر
ما غيره (صياد) اللي يغار منه بعض الناس ويحاول تقليده!
*السيد معوكس صباح العسل والقشطة ملينا من الهلال كل سنة ياخذ بطولة؟
عبدالله العبيوي -الرياض
- غيركم يبي بطولة قريقعان ما حصل
* صديقي العزيز معوكس ماهي نظرتكم لسوق انتقالات اللاعبين خلال الفترة الحالية وماهي قراءتك لها؟
فهد المرشدي- الرياض
- ان ما خاب ظني بتردد الاندية ( ليتنا ما دخلنا السوق)!
* ماذا فهمت يابو العواكيس من حديث مطرف واللي معه؟
- اهم شيء عندي ان ظهوره ادى الغرض!
عزيز