الذبابة والزبادي.. و«كلام نواعم»!

• بعض البشر مثل برنامج «كلام نواعم».. رغم سماجته ورغم أنه ما له شعبية لا يزال مستمرا .. وهذا الكلام ينطبق على بعض مسؤولينا الذين لهم أعوام في منصبهم رغم فشلهم الذريع.
• بعض البشر مثل الزبادي .. خفيف على القلب وإذا كنت «منغث» يشيل الغثة عنك وتسعد بقربه! وهذا النوع من البشر قليل.
• بعض البشر مثل المرة «اسألوا عنها العجائز» رغم أن طعمها وريحتها شينة إلا أنها دواء وعلاج لا مثيل له.. وهذا ينطبق على بعض الأشخاص الذين لا تلقى منهم استقبالا طيبا ولا زود كلاما ولا ابتسامة.. لكنه يقضي لزومك، وإذا بغيته فزع لك ولقيته وقت ما تحتاجه!.
• بعض البشر مثل الذبابة.. ما تطيح إلا على الريحة الشينة! وإذا بغيت تقيل بعد الغداء لقيتها تتمشى عند إذنك وطرف خشمك.. وهذا ينطبق على اللي ما يشوف منك إلا الشين، وما يبلغك إلا بالشين وما يجيك إلا بأشين وقت! يعني وضعه منتهي!.
• بعض البشر مثل «المكينة» إذا بدت تخلط ماء بزيت، لا فيها عزم وفيها «تفتفة» و«تقطيع» ومزعجة بعد.. وهذا ينطبق على الشايب العربجي اللي صبغ شواربه وبرمها ومطلع إيده من طاقة السيارة وتلقاه ماسكا «زقارته» بالإبهام والسبابة.. وإذا مريت من عنده تحس أنه طالب حرش، وما غير يروي قصصه البطوليه «موب عاقل الزير!».
• بعض البشر مثل الشيخ زايد.. كلن يحبه حتى اللي ما قد شافه ولا قد ناله شيء من طيبه وفعله.. وهالنوع من البشر نادر وأحبابهم كثير وبرضو حسادهم كثير!.
• بعض البشر مثل أنثى العنكبوت ما لها خاتمة.. بعد ما تخلص من زوجها تأكله.. وهالنوع انتبه منه.. وقت اللزوم بتلقاه يضحك لك ويبتسم ويناديك بأحب الأسماء لك .. وبعد ما تخلص «عازته» ويوصل لمراده أول من يقلب عليه هو أنت ياللي مساعده!
• بعض البشر مثل الناموسة.. تميز الدم من بعيد وتعرف الدم الزين من الشين قبل لا تشفطه.. وتاخذ اللي تبي وما تحس فيها إلا بعد ما تخلص وتروح وتلقى جلدك انتفخ وبدا يحكك.. وهالشي ينطبق على لصوص المشاريع اللي عندنا.. يعرفون المشاريع قبل لا تبدا ويختارون أكبرها ويقدمون عليه ويأخذونه عن طريق أخوياهم.. وما تحس فيهم وبسرقتهم إلا لما يخلصون ويتقاسمون فلوسهم.. ويجي بعدهم المطر ويكشفهم كلهم.
• بعض البشر مثل وزارة الصحة عندنا.. الناس تعزم على حسابها.. أجل يجيك واحد ويتبرع بنقل فلان وعلاجه في المستشفى التخصصي ولا العسكري.. وشلون تتبرع بعلاج شخص بمستشفى حكومي؟ قاط معهم يوم بنوه مثلا؟!
• بعض البشر مثل شركة الكهرباء.. متلطشة من كل حتة.. لا من الحكومة ولا الموظفين ولا الشعب.. وهالنوع مسيكين ما بيده شيء وكل يكوفخه ويلومه!
• بعض البشر مثل علي عبدالستار.. يغني من أيام محمد زويد الله يرحمه وماطلع إلا «يا شبيه بالحلى وصف الغزال + المعنى يقول» ويبي العالم يكرمونه كل سنة على هالاغنيتين اللي كلماتها ماتت ولحنها جاه وجع بالصدر من كثر «الفكس».. وهالنوع ينطبق على اللي ما سوى بحياته إلا شغلة وحدة ولأنه يعتبرها إعجازا علميا، يبي العالم كله يعيشون هالإحساس.. وفي كل مجلس يعيد هالسالفة ويبي الناس تتفاعل معه برضو!
• بعض البشر مثل مسلسل درب الزلق.. رغم أنه مثلوه عام 77 وعدد حلقاته 13 حلقة فقط وكل حلقة مدتها 30 دقيقة إلا أن الناس إلى الآن تسولف فيه وتقتبس بعض الجمل منه .. وهالشي تلقاه ببعض الأشخاص اللي معرفتك فيهم كانت لمدة سنتين فقط، ورغم مرور الوقت إلا أنك تشعر أن أغلب مواقف حياتك وسوالفك كانت بصحبتهم.. رغم انقطاعك عنهم من سنين.
• بعض البشر لا من حشمته طمع فيك.. وبعض البشر لا من جفيته يودك.
• بعض البشر مثل الطاوس ما نعرف منه إلا شكله وما نذكره إلا وقت الجمال والغرور وهالنوع أحس أنه خسر نفسه بتركيزه على جانب الشكل فقط.
• بعض البشر مثل إشارة المرور يجبرك توقف عنده خوفا منه ليس احتراما له ولما تكون الإشارة خضراء الكل ما يضرب لها خبر .. وهذا حال الرئيس المتغطرس بعد تقاعده.
• بعض البشر مثل المطب الصناعي .. يجبرك تخفف السرعة عنده لكن في نهاية الموضوع ما بيده لا حل ولا ربط مجرد محاولة لإزعاجك ببعض الأسئلة اللي أجوبتها ما تفرق سواء كانت إجابتها بنعم أو لا. لأنك بالأخير ماشي ماشي .. عمركم شفتو مطب يحتاج رقم سري؟
• بعض البشر مثل جواد العلي .. عنده كل المؤهلات لكن ما يعرف يغني ولا له قبول بين الناس .. وهذا حال بعض المتعلمين أصحاب المال والمنصب والناس تكرههم وتكره جلستهم.
• والبعض الآخر مثل عبادي الجوهر .. ما عنده لا شكل ولا صوت ورغم هذا يطربك وله قبول بين الناس لأنه يعرف يغني .. وهذا حاله حال الفقير الشين العطالي البطالي والكل يخطب وده ويرغب بمجالسته.
• بعض البشر مثل أصالة نصري .. يعرف القدرات اللي عنده وواثق من نفسه وعند الأداء يكون الأفضل
• والبعض الآخر مثل فايز السعيد .. لا صوت ولا طرب ورغم هذا عايش الدور مع نفسه
• بعض البشر مثل الشاص .. ما يخيب رأيك فيه ووقت العازة تقدر تشد الظهر فيه
• والبعض الآخر مثل الكيا .. شكل واستعراض ودعايات ولكن إذا بغيته بحاجة ما لقيته .. وما تقدر تسند عليه
• بعض البشر مثل جدة .. الكل يسميها عروس والكل يقول إنها غير .. وبعد ما جات الأمطار ساح مكياج العروس وطلع وجهها القبيح«ورحم الله شهداء الأمطار وجزاء الخونة عند اللي ما يضيع عنده حق» وهالنوع ينطبق على فنانات السيلكون والميك أب
• بعض البشر مثل المنخل .. ما يمسك شيئا واللي تنثره فيه يطيح … وانتبه واحرص أنك تعطيه أسرارك لأنه بيكون آخر يوم لها كأسرار
• بعض البشر مثل الجثة .. لا يضحك ولا يعبر ما تدري هو زعلان هو مبسوط هو ناقد عليك ولا مبسوط منك ما يعرف يفرح لك ولا يحزن عليك ولا يتفاعل مع سالفتك السالفة الأكشن والحزينة نفس الانقعال الأمور كلها سواء عنده.. وهذا النوع انتبه تمسك معه خط سفر لأنك إما بتذبحه ولا بتنزله في نص الطريق بسبب حالة الهستيريا اللي بتصيبك من بروده
• بعض البشر مثل الثعل .. حركاته غريبة وأسئلته أغرب تحس أنه يبي يسحب منك المعلومة بخبث .. وهذه الطريقة المثلى للتعامل معه هو بضربه بأقرب شيء جمبك وهو بينحاش وبيقعد يراقبك من بعيد لأنه جد مثل الثعل.
• بعض البشر مثل الغراب اللي بغى يقلد مشية الحمامة ولا هو عرف يمشيها ولا هو اللي عرف يرجع لمشيته .. وغالبا تلقاهم لابسين جنز وردي وعاصب شماغه
• بعض البشر مثل أهل الرياض إذا جاو للشرقية .. تلقاهم يبون الكل يدرون أنهم من أهل الرياض عن طريق أسئلتهم الغريبة لمجرد أنهم يبون يقولون «إنا بالرياض غير» وهالبشر تلقاهم إذا راحوا لكورس في دولة ما لمدة أسبوع تلقاه يلفون أعناق جميع السوالف علشان يتكلمون عن رحلتهم «الكورسية» بحاجة أو بدون حاجة.
• بعض البشر مثل بعض البشر تلقاهم أشكالهم بشر مع أنهم بشر … سبحانك يا رب البشر.
مدونة إبراهيم القحطاني
http://brhom.net/