بيت وصدى

الأسبوع الماضي كان بيت الأسبوع من طرح الشاعر ريان محمد الخنيفر من الرياض حول موضوع الغلاء الفاحش لأسعار الابل بشكل غير مسبوق والذي يقول:
البل تباع وتشترى بالملايين
فيها غلاء واسراف وايضا غبينه
والصدى من الشعراء حول هذا الموضوع:
راع المظاهر يخلط الشين بالزين
ليته يناظر ما تقدم يمينه
ليته عطى المحتاج ضعف ومساكين
باقرابه وجيران أو زابنينه
فهد بن عقيل الطويان - بريدة
يا الله يا منزل تبارك وياسين
تحفظ بلدنا والوطن بالسكينه
شفنا الغلاء.. شفنا الغلاء بالبعارين
مادرى تباع وتشترى والا دينه
عبدالمحسن بن محمد المحيسن - رياض الخبراء
اقيام فوق الحد ياليل يا عين
منها أكثر العربان نفسه حزينة
مدري ويش اسباب الغلا يا الميامين
اللي الى حد السما رافعينه
سلطان بن حمد الحبابي - الطائف
خافوا من الله واعدلوا يا مسلمين
ترى المطامع بعض الاحيان شينه
وترى الشراء والبيع مع العدل زين
يا صار ما به للاوادم غبينه
زبن مقبل العنزي - بريدة
يا غبن ناس مفقرات ومدايين
من شافهم بالحال تصفق يدينه
ما عاد فيها زين يا اهل المزايين
الزين لا جا بالرديه يا شينه
بندر إبراهيم الخنيفر - أشيقر
يالي شريتوا ابلكم بالملايين
والحلم زين وسعت الصدر زينه
البل عطا يا الله على الراس والعين
شهد له المختار راع المدينه
ياسمين حميد العنزي
من أول (ن) هي راس مال البداوين
لمن بغى الترحال صارت سفينه
واليوم صارت عرض وسط الميادين
لاصحاب روس المال سلعة ثمينة
عبدالمحسن بن محمد الجريسي - الرياض
من خلقت الدنيا على الزين والشين
والرابح اللي فاز حظه بدينه
البل غلاها رجحته الموازين
قبل المواتر للبراري سفينه
اللي رفعوها يالشريهي قويين
وتعدت الاقيام لو هي ثمينه
عواد مفرح العنزي - حائل
الهيم ايه تبهر الفكر والعين
والمال يا ريان فتنه مبينه
صار التباهي والبذخ بين الاثنين
بياعها والمشتري من خدينه
علي آل زولان الفيفي - بيشة
شعوب تفتح في الصناعه ميادين
وحنا لباس الطفل مستوردينه
حنا نفاخر في جمال البعارين
والشال فوق اكتافها مفصلينه
عبدالله محمد آل مسلم - حوطة بني تميم
يا الله تمينا على ملة الدين
وعلى الصراط من اللي هم عابرينه
شفنا الغلاء فاحش في سعر البعارين
ترى العرب كل العرب رافضينه
بيع الوسط مطلوب بالعسر واللين
جانا الغلاء هذا الغلاء عايفينه
عبدالرحمن بن منصور التركي - البكيرية
البل ذكرها الله حياة المسلمين
نقل وكلا والله وسلعه ثمينه
قنابها يفخر حليب ومزايين
وبياعها يعتاش ويسد دينه
لا شك لا وصلت حدود الملايين
تظهر من المعقول سرف وغبينه
مبارك بن محمد بن طرجم - وادي الدواسر
بيت الأسبوع
تجاوباً مع المقترح لقضية بيت الأسبوع «آفة المخدرات» أرسل للصفحة الشاعر عبدالمحسن محمد الجريسي من الرياض هذا البيت حول هذه الآفة:
تدري وش أصعب شي يمكن تشوفه
حبة مخدر تقتل اخوك وابوك
نستقبل صدى البيت بثلاثة أبيات فقط على الفاكس (4871070) أو الايميل rb-khozama@alryadh.com
اقتراح لموضوع بيت الأسبوع القادم
أرسل للصفحة الشاعر/ مبارك بن محمد بن طرجم من وادي الدواسر موضوعاً لبيت الأسبوع القادم وهو الحث على توحيد المجتمع السعودي والانتماء للوطن والدين لا إلى القبيلة والمناطقية.