بيت وصدى

الأسبوع الماضي كان بيت الأسبوع من طرح الشاعر سعود عائش الحربي من جدة حول موضوع عدم توفر أسرّة كافية بالمستشفيات لاستقبال المرضى والبيت يقول:
ما من أسره كافيه بالمشافي
وكم من مشاريع بطيه خطاها
وكانت الأصداء أكثر من رائعة:
الوضع ما يرضي ولا هوب كافي
الله ينزل غيثنا من سماها
مفروض للمرضى مكان إضافي
يستقبل الحالات في مبتداها
تعثر المشروع ما هوب خافي
في غالب الاحوال ترجع وراها
علي رشيد الرشيد - رياض الخبراء
يا الله يا رب البشر يا معاني
تشفي عبادك من مرضها وداها
لأن المريض إذا وصل للمشافي
قالوا حسائف ع السرر ماكفاها
وش حجتك والعذر.. والمال كافي
يامن يخطط قبل ينشئ بناها
علي بن معاضة - الرياض
الادمي مهوب دوم متعافي
ينصاب بأمراض(ن) على الله اجلاها
نأمل من المسؤول مجهود وافي
يحرص على المرضى وينهي عناها
يا كثر ما ينشئ صروح تشافي
الله يعز بلادنا ويحماها
عبدالمحسن بن محمد الجريسي - الرياض
يا للأسف بعض السراير خوافي
ناس تبيها ولا حصل مبتغاها
لا جاء مريض من بعيد ولافي
ماله مجيب وحاجته ما قضاها
بحضوره المسكين يرجي العوافي
مكانه الاسياب ولا به سواها
محمد عبدالعزيز الخنيفر - أشيقر
أكثر عماميل الشرك ما تخافي
ومديرها صوري وياكل وراها
وان ماوجد مسؤول لقال يافي
ونفسه عزيزة ما يطاوع هواها
رحنا مراح اللي تتالت مقافي
وذقنا المرارة مالقينا حلاها
محمد جلمود الشكرة - الدلم
الله طبيب الخلق وهو المعافي
سبحانه المعبود ماخاب من جاه رافع سماها
وضع الاسره مهو ياناس كافي
تحتاج زود وزود فيه نتباها
مليكنا المحبوب وافي ووافي
يا الله تصلح للبطانه خفاها
عبدالمحسن بن محمد المحيسن
الاسره ناقضه ماهيب كافي
راحت الايام وانا في رجاها
مشكله عينت تحل بها المشافي
مادرينا الحل والاوش بالها
الحكومه دعمت والدعم وافي
ومن تعبنا ما الوعود وما وراها
مبارك محمد بن طرجم الضعاوين - وادي الدواسر
ماهيب لحية أسره يالسنافي
قلة مشافي والمصايب بلاها
ما تقبلك لو كان حالك اسعافي
موعد ورامو عد بعيد مداها
ويا لله يلي عالم كل خخافي
تعيضنا بالعافيه عن شفاها
حمد عبدالله الوايلي - حوطة سدير
الوضع للمسؤول واضح يشافي
ودولة هل التوحيد واضح عطاها
كم منتظر بالسيب والا اسعافي
وأصبح ضحيه للاهمال وخطاها
ومن لا يخاف الرب مابه انصافي
والواسطه محد سلم من بلاها
فهد بن عقيل الطويان - بريدة
بيت الأسبوع
كتبه للصفحة الشاعر مبارك محمد بن طرجم من وادي الدواسر حول موضوع غلاء حملات الحج وعدم قدرة الكثيرين على رفع المبلغ
حملة الحجاج ياما أغلى ثمنها
عزتي للي فلا يقدر عليها
نستقبل صدى هذا البيت بثلاثة أبيات فقط تدور حول غلاء حملات الحج وذلك على الفاكس 4871070 أو الايميل: rb-khozama@alriyadh.com
مقترح لموضوع بيت الأسبوع القادم
بعث للصفحة الأخ حامد الغالي من الجوف مقترحاً لموضوع بيت الأسبوع القادم وهو قلة توفر المدارس وتوزيعها في الأحياء ويقترح ان تصغر المباني وتوزع على أكثر من مدرسة وان المجمعات المدرسية لا تخدم الا جزء يسير من الحي.