بيت وصدى

في الاسبوع الماضي كان بيت الاسبوع للشاعر حامد الغالي من الجوف الذي يناقش القضية التي اقترحها الاخ محمد التيماوي من الرياض حول
تشققات الشوارع التي نراها باستمرار وخاصة الشوارع الجديدة التي لم يمض عليها سوى بضعة اشهر.
ما امداه يتزفلت الشارع
شهرين وتطيح بحفوره
وهذا صدى البيت من الشعراء
بالغِش من زفلتِه بارع
عجْل ٍ يبي صرف فاتورة
وللسطح من يستلم ذارع
وغِش الأٍساسات مطموره
اللي مشى شره إيصارع
وفي كل ْ حادث ثبت دورة
فهد بن عقيل الطويان . بريدة
السر يالشاعر البارع
معروف والحال مخبورة
لا صرت للحنظلة زارع
ما تجني الورد وزهوره
مقاول الباطن مخادع
مصدر خساير مع خطورة
عبدالعزيز الصالح - حائل
مقاول ما لقى رادع
طبايع دوم مخبورة
مراقبه ما خفى ضايع
إهمال ومضيّع دوره
عمل مقاول مهو نافع
أموالنا كيف مهدوره
محمد بن عبدالعزيز الخنيفر - أشيقر
أسبابه مقاول بارع
يقبض فلوس على دوره
يعطي المشاريع ويسارع
أسرع من مهدف الكورة
لي صار مسؤولها قارع
على الطبل فترقص بزوره
سعود بن عبدالعزيز الهزاع - نعام
وين انت يالشاعر البارع
ياراسم الحرف بشعوره
نبغاك في وضعنا تسارع
ببيات تغني عن الصوره
يوزع الموت فالشارع
وقبور الاجواد محفوره
عبدالله بن لافي - الرياض
لو كان متعهده رايع
زانت مماشيه بالصوره
الجهد في شغلهم ضايع
عن طيب الاشغال مقصوره
والغش بايامنا شايع
وبعض المشاريع مخطوره
علي رشيد الرشيد - رياض الخبراء
ياشوق عمهوجتن فارع
خلك معي بس فصوره
اللي دخل يسئل الطالع
اسرار بسر مستوره
سعد صنهات السهلي الدرعية
ياناس وش فيه ذا الشارع
توه مسفلت ودي حفوره
ماهوب معقول ذا واقع
هذا خطا فاضح نوره
ما تنفعه رقعة الراقع
ومن شاربه ضايع شوره
مبارك محمد بن طرجم - وادي الدواسر
متعرج ونازل وطالع
تحتار لو شفت له صوره
سبوعين وسبوع والرابع
تلقا الزفلتات مقشوره
بشوارع الشغل من تابع
ما شفت ليلن طفا نوره
مدري عن الوضع والواقع
يا جعل الاحوال مستوره
غنام مسعود القريني - نعام
من الجنوب أو ورى الفارع
ومن جدة لراس تنورة
سكن قديمه وبه صادع
وارواح واصوله مهدودة
والعيب ما كان متصادع
لو كل شخص بذل دوره
سعود عائش الحربي
ان جيت تحكي عن الواقع
شوارع الحي مدموره
المي باطرافها ناقع
تسعين حفره لماسوره
اسير الاهمال ياشارع
وين المراقب وماموره
الاسود هندي العنزي - الرياض
بيت الاسبوع
حول الغلاء الفاحش في اسعار الاضاحي والتي اصبحت خيالية
ارسل للصفحة الشاعر خليف العجيلي من الرياض ويقول
سعر الاضاحي هالسنة باهض حيل
مع الغلاء ياناس جاها بلاها
نستقبل صدى هذا البيت بثلاثة أبيات فقط تناقش وتنقدالغلاء الفاحش لاسعار الاضاحي
الارسال على الفاكس (014871070).
ويفضل الارسال على الايميل rb-khozama@alriyadh.com
مقترح لموضوع بيت الأسبوع
بعث للصفحة الاخ سعد الغازي من الرياض مقترحا لموضوع بيت الاسبوع القادم وهو ضرورة التعامل الطيب مع الخدم في المنازل اتقاء لشرورهم .