بيت وصدى

الأسبوع الماضي كان بيت الأسبوع من طرح الشاعر شبيب بن هذال السبيعي والذي كان يتحدث عن تربية الأولاد والبيت يقول:
ياجب على الرجال يحفظ عياله
لا يسهرون الليل وسط الشوارع
وقد كان صدى البيت جيداً من قبل الشعراء حيث قالوا:
العيال للرجال هم راس ماله
واجب عليه يكون بالحفظ بارع
إن إصلحو طابت حياته وفاله
وكانه غفل عاش المشاكل يصارع
وش عاد لو وقته بطيبه صفاله
كم ضيّع التفريط محصول زارع
فهد بن عقيل الطويان - بريدة
مقال ابن هذال يهل الشكاله
واجب وجوب الفرض ياذيب سارع
ترى التهاون من صفات الجهاله
خلك حريص النفس واعي وبارع
وختامها يالله رب الجلاله
تهدي حضرنا والبدو والمزارع
علي جابر الفيفي - فيفا
شبيب قال وصادق القول فاله
لأجل العيال وحفظها من الشوارع
عيال على الشارع تحوم وهماله
دايم على فعل المشاكل تسارع
ماكن به والي لهم حس باله
وما كن به أب على الحفظ بارع
سعود بن سعد الحافي- الرياض
في وسطها تلقاه يمنى وشماله
ياشينها يا ربعنا هالطبايع
أقول أبوه اليوم سبة دلاله
وأقول أنا في فعله اليوم ضايع
ياهل الوفا تكفون وأهل العداله
يحتاج له وأمثاله اليوم رادع
محمد بن عبدالعزيز الخنيفر - أشيقر
أقول الرجال عن عياله داله
ويحسبنه بفعله هذا بارع
المال محفوظ دايم في باله
والولد تايه ضايع بالشارع
الدين رابط عياله في ماله
وهو من أجل المال يصارع
حمد بن عبدالله الوايلي
- حوطة سدير
هم زينة الدنيا ولو قل ماله
ياللي تحب الخير للخير سارع
من يترك عياله ويلهى بحلاله
لا خير بالدنيا ولو كان بارع
أسلك طريق العلم وأنس الجهاله
وعيالنا هم ثروةٍ بلا منازع
محمد بن عبدالله المجلي
- حوطة بني تميم
ياجب على الرجال يستر عياله
من شر هيس بالمكيدات بارع
ويزرع عياله بالكرم والشكاله
حتى تقول الناس ياحي زارع
يا حي فاله جد ياحي فاله
اللي على الطولات دايم مسارع
حمدان العنزي
بيت الأسبوع
من نظم الشاعر غنام مسعود القريني والبيت يقول:
يا كيف نسلم من كثير العماله
لا روحوا مع درب جونا مع درب
ونستقبل صدى البيت على الفاكس رقم 4871070 «خزامى الصحارى» زاوية بيت وصدى.. وياهلا بالجميع.