بيت وصدى

الأسبوع الماضي كان بيت الأسبوع من طرح الشاعر سعد صنهات السهلي من الدرعية حول موضوع تلبية الدعوة أو الاعتذار قبل ذلك، والبيت يقول:
واجب عليك إلا عزمتك تجيني
ولا على ما قيل تبدي لي اعذار
وصدى الشعراء حول هذا الموضوع:
ناس على الدعوات متهاونيني
وناس تجينا من بعيدات الاقطار
وبعض البشر يعطيك علم يقيني
ويخبرك بالظرف ويش الذي صار
والبعض لا من غاب ما هو يبيني
من خوفته يضرب له اليوم مشوار
ريان محمد الخنيفر - الرياض
ترى التواصل بين الاصحاب زيني
خص إلى حسوا بحشمه ومقدار
خل الزياره بين حين وحيني
ترى الغلا يزدار ويصير له كار
المعرفه تحتاج شخص فطيني
يدرك دروب المرجلة سر وجهار
علي رشيد الرشيد - رياض الخبراء
لدعوتي لازم تجيب وتعيني
والا على الجوال ترسل لي أخبار
وانا رعيتك والنتيجه تهيني
وترى سلومك تجعل الفكر يحتار
والنفس راجعها جعل قلبك يليني
خلك على سلم النشاما والاخيار
محمد بن عبدالعزيز الخنيفر - أشيقر
قل للي دعاك ابشر اجيكم على عيني
هذا مسار اهل السلف درب الاخيار
اليوم أنا أجيك أو بكره تجيني
والزمن يا صاحب العقل دوار
واتبع سبيل اجواد عبر السنيني
ون ما حضرت أوضح لداعيك الاعذار
سعود عائش التميمي الحربي - القاهرة
هذا علوم سنها الطيبيني
تعرف بحق الحار يا خوي للجار
وحنا على منهاجهم من سنيني
متناقلين الطيب من قوم(ن) أخيار
هذي عوائدنا وفي كل حيني
جينا نسجلها على الطرس تذكار
طلاب بن غارم فرحان آل فرحان - الرياض
لا من دعاك القرم ذرب اليميني
خل التغلي والتعذر بالأسفار
حيثه يعدك له حزام وعويني
يبغيك قبل الطيب لامد ثم دار
يوصيك يا محتار في كل حيني
خلك مع اهل العرف وافين الاشبار
عبدالملك بن محمد الكثيري - الرياض
من لا يقدر دعوة الطيبيني
ماشال لهل الجود والطيب مقدار
بالعمد جنب سيرة الغانميني
ما قدر الرفقة ولا الضيف والجار
الطيب زان الوقت ولا يشيني
فصيلة في دم شبابة النار
فهد بن عقيل الطويان - بريدة
مبطي على شوفتك يا ماي عيني
والديرة اللي مظلمة دون الانوار
كن الجماد يذكر الشوق فيني
بنشد: متى تنزل على الارض الامطار
يا صاحبي دامي ابيك وتبيني
عجل عليّ الشوق في داخلي نار
صالح بن رشيد العضياني - الرياض
وعلى وعودك التزم بالفطيني
ترى الوعود عهود إيام تحتار
من لا تعذر أشهد أنه دويني
ما قدر الرجال في دعوة الدار
بالله وحده ربنا نستعيني
والوصل نعمه بين الأحباب والجار
عبدالكريم إبراهيم بن خزيم - البكيرية
للي مقدرني وللي يبيني
لزمن ألبي دعوته دون ما احتار
إلا إذا جاء شيء غصب يحديني
بلطف ولباقة أشرح ظروف واعذار
طول الزمن من ماضيات السنيني
حق الضيافة بالعرب صاير كار
عبدالمحسن بن محمد الجريسي - الرياض
حقي على مثلك كبير وثميني
ما يرخصه غالي ولا تجهله دار
هذي سلوم الناس كانك تبيني
اجيك في دارك وجياتي كثار
وان كان حدك وقتك الله يعيني
مالي عليك حقوق لاصارت اقدار
فهاد بن عبدالله الودعاني
ياالشمري دارت علينا السنيني
وقت مضى مافيه شبهت اعذار
واليوم لامنك ذبحت السميني
تبي كرامة من تعنى مع الجار
أصبحت محرج الله انه يعيني
اللي دعيته ما حصل عنه اخبار
حمد بن عبدالله الوايلي - حوطة سدير
عليك باللي يادعيته يجيبي
ولا تدعي اللي عادته كثر الاعذار
وإياك تدعي واجدا ما يجيبي
وإيام تنسى دعوة الجار لو جار
واللي توده من قريب وصحيبي
قدم له الماجوب لو صار ما صار
زبن مقبل العنزي - بريدة