بيت وصدى

الأسبوع الماضي كان بيت الأسبوع من طرح الشاعر الراوية المعروف رضا طارف الشمري والذي كان موضوعه حبس الإبل في الاحواش الشائكة والتي يدمى لها قلب من كان يذكر انتشارها في البراري والقفار.
وقد كان صدى البيت من الشعراء اكثر من رائع ونعتذر كثيراً عن من لم ننشر له صدى ابياته لعدم وجود المساحة التي تتسع لجميع المشاركين الشعراء:
من بعد ما كانت تدرهم مع البر
وسط الصحاري مسفهل حجاجه
اليوم مشبوكه على الخط تنظر
والناس حوله مكثرين اللجاجه
حليبها بعشرين ينباع واكثر
فعل واشوفه يا جماعة سماجه
يوسف بن منور الميموني الرياض
حزينة والدمع منها تنثر
تبي فراق الشبك فرقا سياجه
تبكي على المرباع والخد الاخضر
بأرض تسر القلب هذا علاجه
تبي الفكاك وبالصحاري تمخطر
ياما تمنى لحظة بانفراجه
محمد بن عبدالعزيز الخنيفر
أشيقر
ترى الابل مكانها بأوسط البر
بين الصحاري المقفرة والعجاجه
مهيب وسط الشبك تأكل وتجتر
هذي تراها عاد صارت سماجه
سفينة الصحراء تراها تقدر
كم قطعت من درب واسع فجاجه
محمد بن مفرج السبيعي - رماح
وياحيف يبليهان كنه مخدر
بشبك العطش والجوع برد وعجاجه
البل هواها ورغبته تسرح البر
ماترغب اشبوك الخلا مع حراجه
ياللي ظلمته وانت هاليوم تقدر
فكر بيوم من ظلمته اتواجه
فهد بن عقيل الطويان -
بريدة
من بعد ما كانت سفينة هل البر
صارت اسيرة شبك عالي سياجه
محكم عليها الشبك ما تقدر تفر
وضع المطية صعب صعب علاجه
حض المطية ذا الزمن شين واقشر
القوت برسيم يثور عجاجه
سلطان بن حمد ابو شقاف الحبابي - الطائف
حطوا عليها حجر مثل المجدر
مثل المريض اللي تعسر اعلاجه
تهل دمع فوق خده تحدر
مثل يتيم الام فقد مزاجه
يلعب مع الورعان ثم يتكدر
اليا رجع للبيت طاف سراجه
بدر بن خلف الحزيمي
من عقب ما هي بالنشاما مع البر
يقضي عليها لازمه واحتياجه
ترعى العشب في نجد بأيام واشهر
اليوم في حوش طويل سياجه
الله يديم الامن والله يستر
عسى يجي لك يا ذلولي انفراجه
ابراهيم بن مسمار القحطاني - الرياض
سلم على اللي ما حبسها ولا ضر
ولا تعقد من سبها حجاجه
الله عطاه ولا حرمها من البر
وكل على ما قيل يتبع خراجه
وطلب لها منشي الحيا يابن شمر
مزن على زين الفياض يتواجه
مسفر بن ثابت آل غانم القحطاني -
الرياض
تحن وسط الشبك من يوم اقشر
من عقب قطع البيد دارت سياجه
يا وجد حال اللي من الامر محتر
صار الدلو يسقي من الماء هماجه
هذي صدوف الوقت يا كافي الشر
ندعي الولي انه يعجل خراجه
سعود بن سعد الحافي
الرياض
يا وجدها وجد على شوفة البر
سحاب يرزم والرزم له لجاجه
تبي تفلي في فياض تخضر
وتبي تشوف البر ويا عجاجه
وضح تبارى والفحل يتبختر
وحمر تسر العين من كل حاجه
فايز بن سعد آل فهد
من عقب مرعاها على خضرة البر
صارت حبيس الحوش والله سماجه
ياليت والوبال ياناس فكر
ماهيب نعجه تندمج مع نعاجه
عديمة الاوصاف ترزم وتنظر
وتقول مدري هل عرب او خواجه
علي جابر الزولاني الفيفي - فيفا
ياوجد حلوات التوادي على البر
في صحصحٍ قفرٍ قليلٍ عجاجه
بحرية تمشي مع البرد والحر
ومن يوم عن يوم يتغير مداجه
ترعى النصي في وادي نبته اخضر
وتبعد عن الديرة وكثر اللجاجه
جلعود لافي الشمري - حائل
الابل والله يا رضا شانها اكبر
حرام تقعد في شبوك النعاجه
لاشك في هذا الزمن حظها اقشر
ماقدروها اهل الدلع والغناجه
بالابل عز الله نباهي ونفخر
ومن لا يحب الابل ماحب حاجه
صالح سفر العمري
من شافها لازم لزوم ايتكدر
ياكود شخصاً زايداً بانعواجه
خبلاً عن الشيمات دوم ايتحدر
ماله على الشيمات خاطر وحاجه
والبل لها عندي مكاناً تندر
رغم انها طاحت بايدين الخواجه
فهيد بن سحلي المغيليثي الرياض
يا محلا يا القرم طلعات للبر
هذا هوا بالي وهذا مزاجه
يا شيخ رضاء الخبر حيل ما سر
وما ضيقة الى وراها انفراجه
وهذا زمان فيه نعمة وبه شر
يا شيخ وين اللي عليها الحداجه
حميد بن خلف الملفي العنزي
يا حيلة الله كنها بقيد تغتر
من عقب هاك العشب باسع فجاجه
اليوم بالمرحان والشبك والحر
ولاهوب حق حبسها دون حاجه
يازينها لا ربعت فيضة السر
وكل على قده يدور خراجه
مبارك محمد بن طرجم الدوسري وادي الدواسر
من عقب ماهي تقطف ازهار بالبر
اليوم تأكل من طعام الدجاجه
تحن بوسط الشبك وتمشي وتفتر
تأخذ بوسطه روجة وادراجه
يا حلوها مع وادياً توه اخضر
بأرض خلا ما داج فيها الخواجه
زبن مقبل العنزي بريدة
بيت الأسبوع
من طرح الشاعر محمد سعيد مخاشن من جدة ويقول:
ببطاقة الفيزا شرينا كل شيء
والماستر سدد لنا الفيزا وراه
والبيت يدور حول موضوع قضاء الدين بالدين وهو موضوع مهم وجدير بأن يتداوله الشعراء عبر هذه الزاوية وذلك بثلاثة ابيات على الفاكس 4871070 خزامى الصحاري زاوية بيت وصدى مع أملنا بعدم الكتابة على الورق المسطر لضمان وضوح الفاكس. كما نرحب بطرح بيت الأسبوع على ان يناقش قضية اجتماعية هادفة تهم المجتمع.