عز الله اني مع هل الحب سجيت وميزت انا عذب الهوى من هماجه شربت من صافي قراحه وعليت والغدر عن بالي بعيد مداجه يوم الهوى ما يقبل اهل التواليت ولا يقبل الخوان واهل السذاجه على الشرف يرفع كما يرفع البيت ومن الوفاء والصبر يوضع سياجه واليوم عن حضرت جنابه تخليت ما دام كثرت به علوم السماجه وطاريه من فكري مسحته وصديت وما باقي عندي لهم غير حاجه السر ما بيحه لو ابعدت واقفيت وكل يروح يواجه اللي يواجه دام العلوم الهابطة جالها صيت والغدر كل منه ولع سراجه وما عاد يعرف صافي الماء من الزيت يوم البلوتوث اندفع في حراجه يمشي العالم على كف عفريت وان غر به راعي الردى والهماجه في مثل هذا لو بحثت وتقصيت يضحك على نفسه بفكرة خواجه بالمال يشري شيء يخرب به البيت وسمعة بيوت الناس مثل الزجاجه ما تنجبر من كسرها لو تنيت كسر يتعب من يدور علاجه يضحك عليه ابليس ويقول سويت يمشي على ما في هواه ومزاجه ويا مطاوع الشيطان غرك وغريت وجميع ما سويت لازم تواجه دين يسدد منك لن رحت وان جيت الله تكفل به ويعلم خراجه ويا الله يا عالم بسري وما اخفيت اجعل لنا من كل ضيق انفراجه والطف بنا فالغرغرة والتناهيت بيوم بها المؤمن لربه يواجه محمد مذكر المغيبي العتيبي
