مرحوم يابونا يا سراج الليل

جانا الخبر غر على البال من لاج
لج الضلوع وأجزل الهم لاجي
ثار العجاج ولج بالرأس بازعاج
من يوم جانا العلم عكر مزاجي
وصار القراح العذب في غور الافلاج
من عقب ما هو عذب ملح هماجي
أقفى الذي تلقاه مع كل محتاج
مناجي المحتاج ومن له مناجي
فهد سراج الليل لا جرهد وداج
لا جا عسامه صار نوره فجاجي
فهد علاج الجرح لا عرج وعاج
لا جا ولا جوا له لجرحه علاجي
فهد لفعل الخير يضحك له إحجاج
ويضحك حجاجه ويحتفي به حجاجي
فهد صعد بالقلب مسرى ومعراج
وشعلت له بأقصاه نور السراجي
فهد يفيض القاف لا عراج
فهد بذكره يسفهل الحجاجي
فهد يزين البيت ويجود لاداج
بين السطور النور يصبح سياجي
فهد نهج للدين مع كل منهاج
ودون كتاب الله، يوهج وهاجي
فهد على السنة والحق وهاج
إليا سجى ليل الدجى سج لاجي
فهد ضميره صافي مثل هداج
ولادامج العذب القراح الدماجي
مرحوم يابونا على الخلد تنلاج
بإذن الولي عالم جليل احتياجي
أرجي عسى الله عالم السر فراج
يرفع مقامك لانجا كل ناجي
وأدعي جميع الناس مع كل هراج
يدعي لك الله لا غدا الليل صاجي
عساك تارد حوض محبوب الأفواج
شفيعنا لا جا الضمير اختلاجي
آمين يا من سير اليم مواج
يا الله يا من بأمره الموج هاجي
وصلاة ربي عد ما حج حجاج
على نبي الله وعد العجاجي