صوت الصورة

حمام ياللي من عناء النوح ولهان
يشكي على عهد مضى بين الأحباب
مستآمن معشش على سراج عربان
غاب العرب وسراجهم عنه ما غاب
سراج قديم وهالك الحال خربان
ياما على وقت الدجا يجمع أصحاب
سعود بن سعد الحافي - الرياض
لصفحة خزامى ابعث تحية مع التقدير
تحية وفا من شاعرا هاضت شعوره
اشوف السراج بشكل غير ومنظر غير
بعد كان نورة ساطع طافي نوره
بعد وقته الزاخر بقا ماكر للطير
بقا ماكر للطير شف منظر الصورة
سلطان بن حمد ابو شقاق الحبابي - الطائف
يا سراج ما قصرت كفيت واوفيت
مثل القمر نورك سطع ماضي فات
واليوم صرت تراثنا داخل البيت
حل بمكانك كهرب فيه لمبات
وانا احمد الله كل ما اصبحت وامسيت
نعمة بها تكييف ونور وعرب سات
علي غنام الغنام - رياض الخبراء
هملوني واتركوني بلا رعية
وعلقوني في ط رف خيمة عمودي
في ديار ما بها غير المطيه
المواتر ما لها حس ووجودي
وسكنتني من الحمام الراعبيه
وأشغلتني بالقيام وبالقعودي
عبدالعزيز محمد ابورشيد - نعام
ياذي الحمامه مخطيه يوم تبنين
بيتك في قلب سراج وبجنب خيمه
باكر يبي يجيك الخطر وبتشوفين
لا جاك جارك وقال هذي غنيمه
نصيحتي وانتي على ما تريدين
والصيد عند الناس ما هو جريمه
محمد عفار المطيري - عنيزة
ضاقت الدنيا على طير الحمامه
بيتها تبنيه في وسط السراجي
من نظرها ياهلي زاد الملامه
راح بيت الطين وزاد الها العجاجي
خالد بن ناصر المخيمر - روضة سدير
شفت الحمامه والسراج بخزاما
والخيمة اللي ما دخل وسطها دش
هذا السراج اللي يزيل الظلاما
تسري عليه الناس ما هي بتبلش
ويوم انكسر ما صلحوه النشاما
جته الحمامه ثم حطت به العش
يوسف بن منور الميموني - الرياض
صورة فريدة للحمامة رهيبة
يا الله سلمها من اللي يصيدون
ارجي عسى خدانها ذي عشيبه
جعل المخايل تنثر الوبل بالهون
يا الله عساها تشوف فروخ عجيبه
ويطير كل فرخ ويجد بلحون
فايز بن سعد آل فهد - الخرج
وكر الحمامة بفانوسي..
اختارته غصب وارتاحه
باضت وقبل كان ناقوسي..
يضوي عليّ كيف تجتاحه
سجلت ذكرى بقاموسي..
بتاريخ واليوم بافصاحه
عبدالرحمن عبدالله الطفيل - حائل
ماهي على الكيف وابكيفك
شيدتي العش باسراجي
من دون علمي هي اللي لك
ما حد سواتك علي داجي
تريضي ولا فقس بيضك
شدي رحيلك بمنهاجي
ابراهيم بن حسين الطفيل - حائل
أظنها خيمة كواشيت عزاب
راحوا وخلوها غشامه غشامه
على السراج اللي معلق بالاطناب
بنت عليه العش ذيك الحمامه
جات الحمامه تحسبه راس مرقاب
يمكن من الصياد تبغى السلامه
حجاب مخلد الظويفري - عنيزة
ضاقت وبيضتي بأسراجي
ضاقت بك أفواج أرض الله
توكلي دون الإحراجي
وأقول انا في أمان الله
لابد لأسراجي احتاجي
نصيحة قال عبدالله
م. عبدالله بن ابراهيم الطفيل/ حائل
السراج معلق وسطه حمامه
في عمود شراع مادري كيف جاته
من دخل في البت يبشر بالسلامه
ما تحسب سيته وكثر حسناته
قاله اللي ما يخوجل في كلامه
يعجب الجمهور لا جات اكلماته
شبيب بن حمود بن جلهم القحطاني - محافظة المزاحمية
طيري عن المكان لا قرب الليل
قبل المعزب ما يولع سراجه
بعض المزاج يدهورك بالبهاذيل
يبي يعدل في مزاجك مزاجه
لا يغرك كانه سكت عنك وحليل
يمكن يجي زعلان وقاضاً علاجه
عبيد فنيس الوهبي- النعيرية
تهني يا حمامة وافرحي في خيمة العربان
بدار ما بهاحس ولا رس ومهجوره
على عشك تهني والحذر من هجمة الغربان
على رمز السلام الخوف من هجمات مخطورة
ترى لك موقع بقلوبنا والقلب بك حيران
حمامتنا حماها الله عساها دوم مسرورة
محمد بن عبدالعزيز الخنيفر - اشيقر
ياهول ما شفت يا ابراهيم
باسراجنا شفت انا راجن
حمامة صمّمت تصميم
تصنع وكرها على الماجن
معلمة ما تبي تعليم
سبحان منهو لها فاتن
م. عادل بن سليمان الجمحان - بريدة
يا طير ياللي ساكن وسط مصباح
في خيمة يم افياض البعيدة
قاعد على بيضه بلا حس وصياح
يجلس بعشه خايف من مكيده
مكيدة اللي لا أظلم الليل نبّاح
يسطي عليه ويدمر العش بيده
عبدالكريم بن ابراهيم الخزيم - البكيرية
والى حمامه كيف صنعتي الافكار
وشلون سكنتي وسط الفوانيس
موقعك شين وتكثر به الاخطار
يا كيف راحت عنك كل الهواجيس
وينك عن الريضان وبعالي الاشجار
عن الخطر فوق ودونك متاريس