صوت الصورة

سبحان ربٍ يحط الولف
بين المخاليق وأنعامه
والقبعة لابسه من خلف
واصغير القوم قدامه
عبدالكريم عبدالرحمن السلوم - القرائن
الرفق مطلوب على هالحوير
هذا بهيمة ما خفاكم وتدرون
خله مع أمه حيث توه صغير
والخوف من الله واجب لا تغفلون
محمد بن عبدالعزيز الخنيفر
لبستني قبوعي ماني مطيقه
من شان صورة واضحة للخزامى
ما دري خيال الشغل والا حقيقة
من فضلكم يا طفل فك الحزامى
عبدالرحمن بن منصور التركي - البكيرية
تعال في درب الحياة نتخاوى
كل واحد منا مدشر ومفرود
كل الجروح تعالج وتنتداوى
الا حنان الأم لا صار مفقود
عبدالعزيز علي الصالح - حايل
خلك تعلم مجد جدك وماضيه
وقت الجلادة «والصبر» والعزيمه
لبس حوارك واحضنه لين تدفيه
جدك قبل دايم يجيب الغنيمه
ماطر بتال الشمري - الجبيل
الحوار مع الغلام بصورة كتف بكتف
والهدية قبعة فوق الحوار من الغلام
الصداقة جمعتهم والوفاء يدعم بولف
دامت الصحبة ودام الولف يا أصحاب المقام
علي بن معاضة - الرياض
صاح الحوار وقال بلهون بلهون
لا يا طفل أتعبت راسي تغوله
تليتني خطر على العين وسنون
وعبر الخزامى كل طيب بقوله
حمد عبدالله الوايلي
جيلك مثل جيلي عسى الله يخليك
(الكاب) معه (الجنز) شي أساسي
موضاتنا يا (حويري) جات تغزيك
ما باقي الا تنام فوق الكراسي
مسفر علي بن سلوم المقاطي - الرياض
صغير وشوف الذود يجلي عماسه
شعاره قول النوق عز ونواميس
قبعه من راسه لبسه فوق راسه
صور معه ولبسه خوش تلبيس
محمد ابراهيم الفهيد - الزلفي
ياللي مسكت الحاشي أحذر نواياه
حتى ولو لبسته اليوم قبوع
كم واحدن قبلك كسر له ثناياه
وكم واحدن خلاه من الرجل مقطوع
خالد بن ناصر المخيمر
يا بكر بن هذال لاهنت مشكور
نشرت صورة تخلي الشاعر يغني
صورة حوار لابس الكاب مجبور
يبغى يواكب عصر الموضة والفني
تركي حسن العلياني - المزاحمية
صورتني غصب وأنا ما استعديت
واحكمت مسكي كني راعي جنيه
لو شفت زولك قبل درهمت واقفيت
لا تتركن أرجوك عطني هدي
عبدالمحسن بن محمد المحيسن
الصوت للصورة على شان صوره
طفل يضم إحوار ويشد راسه
خلك حذر لا تنطرح تحت زوره
موذيه ما ينساه لانام داسه
فهد بن عقيل الطويان - بريدة
الفين وتسعة حوارة خش في الموضه
من ماركات الطواقي يلبس الكابي
شله من الحوش وحطه بخضر الروضه
أحسن لكم منظراً يوم كنتو أصحابي
سعود بن عبدالعزيز الهزاع - نعام
هذي نتيجة الانفتاح والعولمه
صار القعود يصور بقبوع
منأول صعب ما أحداً يلزمه
واليوم شوفه بيد الطفل طوع
محمد سعد الجروي - الرياض
نرحب بمشاركاتكم الشعرية على الفاكس رقم 4871070
او الايميل الخاص بصفحة الخزامى:
R B - KHOZAMA @ alriyadh.com
زاوية: (صوت الصورة).. وياهلا