صوت الصورة

معلوم إلا جانا المطر سال وديان
وعمت تباشير الفرح كل ديره
وذاك الولد واقف على السيل فرحان
في وقت ما بين العصر والظهيرهة
في روضة فيها الشجر وسط غدران
روض بها ريح الخزامى نظيره
سعود بن سعد الحافي - الرياض
أب وطفلين بشعيب يلعبون
ما يعرفون السلامة من الخطر
أنصحهم بأسرع وقت يطلعون
لا يجيهم الجارف عقب المطر
لو يجيهم فجأة والله يبلشون
عقبها ما ينفع يا ليت والدمع لا قطر
فهد الفيروز - عنيزة
ضحكة الطفل أحلى من عسل
والبراءة واضحة في بنت قمر
بس أنا خايف والبال انشغل
من عواقب فرحة تتحول كدر
اتركوا المويه حالاً في عجل
من سيول جارفه التزموا الحذر
ناصر بن جمعان آل عوض - وادي الدواسر
ياللي مع الورعان تلعب ومرتاح
دفيت نفسك بالملابس عن الثلج
مبسوط تضحك يوم ثلج السماء طاح
والبرد في قلب الصغير ولج.. ولج
الورع كنه جرها نعيط وصياح
يعلج يديه من القهر والشقا علج
فهيد بن سعلي المغيليثي - الرياض
حافظ على اخوانك وابعد عن السيل
ياما غدت بالسيل ناس كثيرة
ابعد عن الوادي وعن مدرج السيل
واحذر من اهوال السيول الغزيرة
ياجا المطر من صادفات الهماليل
خل السلامة للأمور الخطيرة
عقلا خزن العنزي - تبوك
بعد المحل يا زين ممشى شعيبه
يجلا صدا قلب شكى زايد الهم
وطب الكبود اللي بحلبه طبيبه
واللي شكى صدّة ولد خاله وعم
يالله يللي من يسالك تجيبه
تزيد خير فيه خلقك تنعم
فهد بن عقيل الطويان - بريدة
يابو البزور اللي من البرد تنفض
وين الثياب ووين لبس البجامة
طفلك حلاته يابن الأجواد يركض
لا تمسكه خله يطلق اعظامه
بعد السباحة اغلب اطفال تمرض
لا صار في وقت باردات ايامه
خالد بن ناصر المخيمير - روضة سدير
السيل يجري مع الوادي
وأنت تحداه بأطفالك
خليت موترك من غادي
وإسعاف الإنقاذ ما جالك
قدامك العمق يزدادي
ارجع ترى شوري أشوالك
شجعان سعود المقاطي - الرياض
ألا يا مرحبا بالسيل أقول أهلاً بنزول الخير
أقول الكل يفرح به وله يالقلب منزالي
وأشوف البعض إلى منه مشى له ينقصه تفكير
أقول ان التهاون من طبوعه وأيضاً الاهمالي
أقول السيل ما يرحم نصيحة والخطر لا يصير
تروح بسالفة ثم النتيجة تفقد الغالي
محمد بن عبدالعزيز الخنيفر - أشيقر
خذها نصيحة في جزيلات الأشعار
جنب دروب السيل يا هيه وشره
كيف في روض مخضر فيه نوار
راعي الأمانة.. راعها من المضرة
السيل غدّار ترى فيه الأخطار
جعله على الشعبان يسري بضره
فايز بن سعد آل فهد - الخرج
يا رجل يا ماسك الورعان
حذراك ما السيل وأخطاره
لعب مع السيل والغدران
خطرن ولا تعرف أسراره
كم واحدن يلعب وفرحان
عود وهو يندب أشواره
مبارك محمد الدوسري
- وادي الدواسر
لا تهاب السيل واسبح يا الصغير
دام ابوك كبتن سباحة لا تخاف
واحترس من الطين مفعوله خطير
كم غريق صار من فوقه لحاف
ماكتب للعبد ملزوم يصير
مدون باللوح بعيونك يشاف
مشاري خالد الدعجاني - شقراء
السباحة وصية من وصايا الحبيب
صفوة الخلق قبل يموت وصابها
بس الأطفال لا تغرق بوسط القليب
المياه الخطيرة احسب احسابها
لا تسبب لنفسك مشكلة يا لبيب
ابعد.. ابعد.. عن الأخطار وانشابها
سلطان بن حمد الحبابي - الطائف
أشوف لي رجال ماسك بطفلين
بالبر وخايف لا عياله يعيعون
ناسٍ على الأولاد دايم حريصين
وناسٍ عن حق العيال يتخلون
الناس.. ناسٍ بين جاهل ومسكين
وناس بها فاهم.. وعاقل.. ومجنون
زبن مقبل العنزي - بريدة
عن دروب الأودية خلك بعيد
لا تدش السيل في وقت المطر
الأطفال صغار ما تعرف تحيد
لا تعلمهم على دروب الخطر
مطر شباط الفهيقي - تيماء