صوت الصورة

روّح مراح مقيط جيب الوليده
وآعزتي له كان مشراه بالدين
والسيل أهون من طواريق سيده
لا علّق الموتر على خط سيدين
محمد بن فهد الجلعود - سميراء
ياناوي المكشات في وقت الأمطار
مع رفقةٍ تسلى بهم يعجبونك
أبعد عن الوادي ترى السيل غدّار
ما دام عقلك تهتدي به يصونك
إبراهيم بن راشد آل مغيرة - ضرماء
يا راعي الجيب وش حدّك
إتطب في السيل وتخاطر
طمرت باالجيب ثم غرّك
في السيل غرزت يا الشاطر
شوف الدبل عنك ماسرّك
مشيك خطا حزّت الماطر
مبارك محمد بن طرحم - وادي الدواسر
الجيب ماهوب غواصه
ولا هوب مائي يعبر السيل
الما تحت عاديٍ شاصه
أزهم لربعك وصالك الليل
سعود بن عبدالعزيز الهزاع - نعام
يا كود طلعتك يا مقرود
ما أوحيت كل التحاذيري
يالله أبشاصٍ وايره ممدود
يسحبك من هالتجاريفي
عبدالكريم عبدالرحمن السلوم - القرائن
ياللي تخوض السيل بالجيب ماشيه
للتهلُكه عرضت نفسك ومالك
عندك خبر باللي غدو في مجاريه
لا تبتلي بأحزان فقدك عيالك
بالصيف مجرى السيل ماينزل فيه
واللي نزل به عرضةٍ للمهالك
فهد بن عقيل الطويان - بريدة
يا راعي الفكس أر كيف السواتي
أنشبت نفسك والخساره كبيره
الصوت ما ينفع بفوت الفواتي
لازم توقع يوم شفت الغزيره
علي رشيد الرشيد - رياض الخبراء
لا صرت في وقت الشتا إحذر السيل
وأكثر حذر لا صار ممشاك بالليل
والموتر الغرقان أكبر دليل
في حاجةٍ للسحب والله وكيل
ومهما حدث تشوف منظر جميل
طبيعةٍ عذرا .. وجواً عليل
سعود عائش الحربي - القاهرة
السيل في مجراه ما يرحم اللي
اللي تعرّض له وجا في طريقه
يا سايق الصالون مالك مدلي
يرشدك ويجنبك دربٍ وهيقه
ترى الهوى والنفس لك تستحلي
ما كان محذور ويغري بريقه
علي بن معاضة - الرياض
يا جيب غر صويحبك طيب معدنك
هو ما درى إن السيل جارف وقتال
يا جيب وين صويحبك مبعدٍ عنك
هو ما قدر يظهرك في يابس الجال
منه الخطا يا جيب ماب الخطا منك
يا الله عسى الانقاذ ياتيه فالحال
ناصر بن جمعان آل عوض - وادي الدواسر
ياما حلى المكشات بارضٍ فسيحه
وقت الربيع وبعد طهال الامطار
بس إن راعي الجيب عاف النصيحه
غاطس بوسط السيل في جيب فكس آر
إبراهيم موسى الخبيزي - الرياض
فكس آر مايل والسبب قلّة الحيل
عجز الدبل لا ينفعه في غرازه
ياللي ترها لا تهاون مع السيل
شف موترك مابان إلا قزازه
قرّب له السطحة.. وعجل على الشيل
وساعد بنمره لا تهمّل هزازه
خالد بن ناصر المخيمير - روضة سدير
ياما حلا المكشات في وقت الامطار
في موتراً إليا مشى يطرب العين
مير الونس ينهار في وسط الاخطار
غرّه علوّه واسفله رايبٍ طين
سعد الحماد - روضة سدير
لا واحسايف وقعة الجيب بالسيل
جابه غشيمٍ ما يعرف الدروبي
والخيل له خيال يدراه ويخيل
سود السحاب ليا نشت من جنوبي
عبد الكريم راشد التميمي – الغزالة
مالت بي الدنيا كما ميلة الجيب
حاولت أعدلها ولاني بقادر
لكن رجاي بعالم السر والغيب
يفرج هموم اللي على الوقت صابر
حزام القحطاني – عرعر
ياللي نويت السير في وقت الأمطار
فكّر بدربك لا تشوف الملامه
أنا أشهد إن السيل يا صاح غدار
لازم من التفكير قبل الندامه
محمد عبدالعزيز الخنيفر – أشيقر
يا جيب وش بك وطيت السيل
أو ساقك الشوق بحموله
أو هقوتي ما رقدت الليل
سهران في خطك بطوله
سيف محمد القويفل - الرياض
الجيب مايل بالمطر تقل تمساح
عطوه في اليابان دورة سباحه
بعض العرب لاسمعوا إن المطر طاح
في هقوته يسهل عليه اجتياحه
حميد محسن الصاعدي – الرياض
صورة العدد السابق
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة