حاشي معروف من نسل الجمل وارث طبعه لو سني صغير رافع راسي شامخ كالجبل ارتكي للحمل لو كانه كبير ناصر بن جمعان آل عوض - وادي الدواسر بنت البدو وقت المهمة خبيره ما تعمله يعجر عنه بعض الاولاد صغيرتن في السن لكن كبيره في كل وقت تعجبك بنت الاجواد الله يكافيها العيون الشريره يارب جرها من بلا كل حساد سلطان حمد الحبابي - الطائف أنا اشهد إن بنت البدو شانها شان مهما بلغت بأدنى العمر او كثيره تشفق على فعل المواجيب باتقان تنجز ولكن اللوازم عسيره ما هي مفازيع ولا قول بهتان صورة عدد وسط الخزامى بريره سعود بن سعد الحافي - الرياض سبحان من صخر الحاشي يطاوع اللي يقودونه لو يجفل منهم وينحاشي بعض العرب ما يردونه مربوط ما هو بيعتاشي ويطالع البنت بعيونه شبيب بن حمود القحطاني - المزاحمية يا بنت ياللي فعلها فعل الابطال تستاهلين المدح تستاهلينه لا والله اللي بنت من نسل رجال فيك الشجاعة والعضود المتينه سحبتي المفرود لو ما به عقال وما هي بعيده بعدها تركبينه خالد بن ناصر المخيمر - روضة سدير أشوف البنية في هلع كيف هذا صار! تشد الخطام وقلبها يرجف ارجافي واقول الخطر ينتابها والفكر محتار الا من يرد الصوت انا اقول يا كافي اقول انقذوها وارحموها من الاخطار يا حيث الجمل معروف لا صار متعافي محمد بن عبدالعزيز الخنيفر - أشيقر اللي ومر هالبنت مخطي ومليوم هذا جمل ما يحتمل ظلم موذيه يخص من يوذيه لو كان بالنوم ومن دون موته لا برك ما يخليه والا يشله شل من يدرج الحوم كم غافل قطع بنابه علابيه فهد بن عقيل الطويان - بريدة يا بنت تو القعود اصغير حبل الرسن لا تتلينه انتي صغيرة وهو صغير ليتك مع امه تخلينه خليه حتى يغدى بعير ويصبح قوياً تشدينه زبن مقبل العنزي - بريدة يا بنت هجي من المفرود لا هاج من يلزم اخطامه يتل حبله لا شاف الذود يا ويل من كان قدامه الإبل من خلقت المعبود سفينة البر عزامه عوض بن شبيب القحطاني سبحان من سخر لنا عير الانعام بامره تقوده والنجيبة على الكيف شفت الصغيرة تسحب الطود بزمام نوخ حقيقة لا تظنه سواليف وان زود عنادك ضربناك قدام كل الغنم وتصير سيد المخافيف عبدالكريم النغيمشي - الربيعية الجمل مع الغنم عايش لحاله مايبي البل لو يشوف امه معاها والله انه خاين مابه جماله شاربن در الغنم يمشي وراها والبنية تبعده ياوي حاله ما يقاود بالرسن والله بلاها مطر شباط الفهيقي - تيماء أفزعولي يا جماعة ما قويته ناحل جسمي وهو طبعه عنيد خايفه على الغنم منه وجيته ابا ارده بالرسن عن ما يريد ما حدن حولي وبالفزعه نخيته الجمل هايج ومن طبعه شديد عقلا خزن العنزي - تبوك
