عاشر مستحيل

يا وجودي لاطراء مامضا عبر الليال
وانتهى من واقعي وصار مثل المستحيل
وجد من شاف الغبينه وهو يسوى رجال
حدته سود الليالي على كف البخيل !
يوم شفت ان المحبه غدت مثل الخيال
وانتهت عشرة عمر باقيه مع كل جيل
وانتهى وقتٍ جمعنا على حب ووصال
وانطوت صفحة غلا وانتهى العشق الاصيل
وحلّت الفرقا وضاقت علي من كل جال
يالله انك تجبر القلب في فرقا الخليل
مابغت نفسي المفارق ولا قطع الامال
ولا بغيت البعد عنّك من الشي القليل
تدري انه بالخطاء والجفا ضاق المجال
تستلذ بطعنة اللي غدا منك عليل
ماذكرت إلا الوفاء والغلا ولا الدلال
شجرةٍ ظلتك في ظلها تلقا المقيل
ولا ذكرت الا تحملت شي مايطال
ارتكي لاحزان قلبك ولو حملي ثقيل !
ماذخرت براحتك شي من حال ومال
ولابغت نفسي من الخلق غيرك لي حليل
ولا سمعت لعاذلٍ فيك ولا هرجٍ يقال
تلّ قلبي يومك اخطيت وانكرت الجميل
لكن اني بنت شيخ يهابونه رجال
مارتضي ذل الكرامه ولا قلبي ذليل
اشتريت البعد واقفيت وانهيت الجدال
العذر ما ينفع اليوم قررت الرحيل
لا تحملني ملامه ودمعك يوم سال
رجعتي لدنياك صعبه وعاشر مستحيل