اللغز

الاسبوع الماضي كان لغز الاسبوع من طرح الشاعر سعدون الشمري من الجبيل ويقول:
ويش رجل لا رباع ولا سديس
واعتلا عوص النجايب والمسوس
لانظرته تعرف إن العيس عيس
بكرته حره وهو صنع المجوس
وقد توصل للحر شعراً:
ذا جهازاً ينشرى ما هو رخيس
عندكم ياهل الهجن بأغلي الفلوس
ما ادري وش فيه شكله تقل كيس
لو مشى قدام بالعكس معكوس
سعد صنهات السهلي - الدرعية
مرحبا ياللي على المعنى تقيس
والمعاني تبي وزن وتبي قوس
لغزك اللي لا رباع ولا سديس
الجهاز اللي على الوضحا المسوس
مطير عبدالله الشمري - الجوف
رجلك المشهور لا حمي الوطيس
كل هجان على زره يدوس
يشبه المخيول حماي الغريس
من جهل به عنه ياخذله دروس
عبدالله هليل الحربي - الخرج
لغزك اللي لا رباع ولا سديس
صوره الراكب على الفاطر تحوس
بالجهاز يصرفونه ما يقيس
بالدارهم يشترونه والفلوس
محمد ابودحيم - البدائع
مرحبا حييت يالدر النفيس
والرجال اللي تقوس العلم قوس
في سباق الهجن في عصر الخميس
رجل آلي ما حضر عهد البسوس
صلاح بن عبدالله اليابس - رحيمة
ذاك شيء كنت احسب انه ابليس
في ردوف الهجن بالويلس يلوس
اصبح الهجان ما عاده نفيس
هيكل مصنوع يشرى بالفلوس
ياسر الهمزاني - الرياض
اللغز بين وحنا له نريس
صانعه بيطار والقصده الفلوس
ذا جهاز يحترك وقت الوطيس
من علا كور النجايب ما يلوس
مبارك محمد بن طرجم الدوسري
من يحل اللغز في فكره يقيس
رمعتن للغز كنه حد موس
راكبن اللي ويحفظ وسط كيس
اسمه (الريبورت) وحط وسط قوس
عبدالله حمد البهدل - الربيعية
يا هلا بالشمري عد الغريس
والخزامى حبها وسط النفوس
خذ جواب اللغز من قول مسليس
(رجل آلي) محتسبنه بالليوس
علي رشيد الرشيد - رياض الخبراء
بالربوع اللي قبل يوم الخميس
كان هو اللي يسوس الهجن سوس
رجل آلي لا يحس ولا يقيس
كنه الانسان في وضع الجلوس
سعد مويزر مشعان البدراني - الرس
الخزامى ريحها كله ونيس
لا غشى سيل الفياض امع الطعوس
(رجل آلي) صانعه رجل نحيس
شر نفسه بالعلوم وبالدروس
فالح غازي الحربي - رياض الخبراء
لغزك اصله لا رباع ولا سديس
برمجه راعيه جاهز بالجلوس
كم جهاز امربطينه فوق عيس
لا توانى في ريموته قال دوس
ميسم بنت حمد السحيباني - البدائع
لغزك الهجان في قاس قيس
رجل آلي في يمينه سوط قوس
عبدالله سعد عبدالله السهلي - الدرعية
كما توصل للحل نثراً: خالد سعد السهلي - الدرعية.
لغز الاسبوع
كتبه مرتاح بن سبهان البدراني من الزلفي ويقول:
يا ربعنا ياللي تحلون الالغاز
ياهل الوفا والمعرفه والمكانه
ياويش رجل يرتكي فوق معكاز
وان طاح معكازه يطيح بكانه