اللغز

الأسبوع الماضي كان لغز الخزامى من طرح الشاعر محمد الزبن الخالدي من الرياض والذي يقول:
يا ويش رجل للمهمات مذخور
يفزع لاخوه بهمته لا انتخى به
أخوه جنبه دايم يسمع الشور
والروس فيهم بالنسامى تشابه
ما قد ملكهم غير طيب ومنعور
رجل على الشدات يملك صلابه
وقد كانت حلول الشعراء:
يالخالدي لعزم مبين ومشهور
هذا الدبل في موترك ينغزابه
كم موتر وسط الرمل طاح مثبور
لولا الدبل في القير ما عاد جابه
علي الوعلان - الرياض
يالخالدي لغزك عرفته على الفور
لغزن جميلن يرفه من درابه
هذا الدبل معروف يا راعي الفور
يازين مشيه لا تقطع سرابه
قاسم بن محمد الداود - الخبر
لغز(ن) كتبه الخالدي عدة سطور
وللي يبي المرماع مفتوح بابه
ذاك الدبل يا خوك معروف مخبور
الله من طعس(ن) علاه ورقى به
أحمد بن ناصر المحرج - الرياض
قريت لغزك يامحمد ومشكور
لعزن كمل والفكر للحل جابه
يالقرم هذا القير وخوه مذكور
ذاك الدبل والحل وصلك كتابه
فزاع الشمري - حائل
يا مرحباً ن خاطر دوم مسرور
باللغز واللي كتبه مرحبا به
ذاك لدبل ياصاحبي مابه قصور
يفزع لأخوه القير وقت النشابه
أحمد صقر الموسمي - الرياض
سلم على الي بالمهمات مذكور
اسمه (ديل) مشكور من هو سعابه
واليوم ما بيعه ولو صرت كتور
يوم الشوارع كنه دروب غابه
خالد راضي الرمالي
يالخالدي معجب بلغزك ومبهور
وجاب الغنايم من يطول غيابه
ورغم الصعوبة جبت حله على الفور
هذا الدبل متأكد من جوابه
سعد مويزر مشعان البدراني - الرس
لامن نويت القنص والحال ميسور
حاذر وحيد الدفع ما ينغزابه
ترى الدبل بالعزم له دور مشهور
تمر فوق الطعس مر السحابه
عبدالرحمن السويس - وادي الدواسر
يابن زبن الرجل ما عنده قصور
هذا الدبل فالجيب دوك الاجابه
يقطع نفود الرمل ما ضره الجور
ليمن سرى بالليل فوقه ذيابه
عبدالله بن محمد آل مسلم - حوطة بني تميم
يالخالدي لغزك قريته ومشكور
وكل ترى للغز يحسب حسابه
حله دبل دايم مع الجيب له دور
لا نزّ ل بانفد ولا رقابه
علي رشيد الرشيد - رياض الخبراء
هذا الدبل يغلاك بالجيب والمور
والطعس لامن جاه ثوّر كابه
يفزع لاخوه القير والكل له دور
يالله عسى أبو دحيم جاب الاجابه
محمد أبو دحيم - البدائع
يالخالدي لغزك مضبط ومحكور
ما يزينه ياكود فاهم ونابه
القير ياخى والدبل صار له دور
وان جاء مع الغراز يحسب حسابه
زبن مقبل العنزي - بريدة
كما توصل للحل نثراً كل من فلاح راضي المطرفي، هادي سعيد الدوسري، عبدالرحمن إبراهيم المشعل.
لغز الأسبوع
كتبه للصفحة الشاعر سعد صنهات السهلي من الدرعية ويقول:
يا ويش رجل تفره حرمة فرا
ومنين ما جات له يالربع يفتري
لو جات له داخل الغرفة طلع برا
الرجل من دونها ماهوب ينظري
نستقبل الحلول على الفاكس 014871070، ويفضل الارسال على الإيميل
rb-khozama@alriuadh.com
كما نرحب بطرح الألغاز.