اللغز

الأسبوع الماضي كان لغز الأسبوع من طرح الشاعر مخلف سعيد الشمري من الأحساء والذي يقول:
ويش شيء واضح بهاك البطين
دايم معنا ولا عنه غنات
شكله مدور ووسطه فتحتين
وله اشكال منوعه شي ثابت
ما انت حوله وافهمه كانك فطين
اسمه مذكر ولا فيهم بنات
وحلول للغز من الشعراء:
مرحبا يا مرحبا ولغزكم لغزن سمين
والمعاني للفطين شاملات موضحات
الازره با الثياب من قديمات السنين
الثياب من دونهن يا رفيقي عايبات
عبدالله عبدالرحمن عمر اللاحم - الشماسية
ابدا ياسم اللي خلقنا من طين
خالق الخلق محصي الكاينات
جواب اللغز من دون نخمين
زرار تزين به الجاكيتات
صالح إبراهيم السنيدي - الوشم
جاك حل اللغز والخافي يبين
يا لله اني طالبك حسن الثبات
ذاك زر الثوب ياللي لابسين
شفهن بزي الخليجي واضحات
عبدالله بن عاتق الغرابي - رياض الخبراء
يا اللي كتبت اللغز يا بن الكريمين
الحل واضح مالنا عنه غبات
زرار وسط الثوب شفناه بالعين
واليا انقطع واحد صارت صعيبات
خالد فرحان الهبداني - الرياض
مرحبا بك الف يا الرجل الفطني
ذاك ازرار مع ارجال وبنات
بالجريده تلقى حاله لك يبين
اسأل الله للجميع أكثر ثبات
عبدالله عبدالرحمن العجلان - البكيرية
حل لغزك ما يكلف يا فطين
فاهمين الحل ما به مشكلات
الزرار اوكاد انا عندي يقين
جبت حله وافي بعد الصلاة
فلاح غازي الحربي - رياض الخبراء
لغز مخلف وصلنا والله يعين
قمت افكر وابتغي جمع الشتات
لين قلت ازرار هذا هو يقين
والتحيه والغلا عد النبات
علي رشيد الرشيد - رياض الخبراء
صح لسانك والزرار ابفتحتين
والبعض منهم له اربع فتحات
هذا حله وبقول الله يعين
والسلام اختام لرجال وبنات
محمد أبو دحيم - البدائع
يا سعيد زرار ثوبك لو تخفونه يبين
واضح يالشمري عندنا شي ن ثبات
جمعان بن حشر بن قويد - وادي الدواسر
لغزكم ما هو خفي يالطيبني
ونرسل لمخلف حلوله بينات
الزرار الحل والمعنى يبين
في ثياب الشخص دايم بارزات
محمد بن عبدالعزيز الخنيفر - أشيقر
كما توصل للحل نثراً:
عبدالرحمن بن عقلا الشريهي من الشعيبة حائل
لغز الأسبوع
كتبه محمد بن صالح الأطرش من رياض الخبراء ويقول:
انشدك عن ورع تسمى بمخلوق
وهو بالحقيقة من جماد صناعي
به ميزة تطمن له الروس من فوق
قايد مع اخوانه بمشي جماعي