سمعة ترى حله ولا نيب غلطان هذا جوابه رغم انك مخفيه

كتب لغز الأسبوع الماضي الشاعر خالد المرشود من الرياض والذي يقول:
انشدك عن بنت لها يا ولد شان
ولا فيه بيت إلا وموجودة فيه
أول وثاني حرف قاتل للإنسان
وعكس أول الثلاث للفكر تشويه
وهاكم الحلول الصحيحة للغز:
سلام يا خالد ترى اللغز مليان
حنا نتشرف يوم حله نسويه
سمعة ترى حله ولا نيب غلطان
هذا جوابه رغم انك مخفيه
علي الرشيد - رياض الخبراء
محمد بن عبدالرحمن - أبو دحيم - البدائع
عندي نصيحة ما تقدر بالأثمان
والنصح للغالين ملزوم نبديه
سمعتك خله طيبه بكل الأزمان
تكسب رضا الرحمن والذكر تحييه
صالح الزرير التميمي - الرس
ويا مرحبا باللي كتب لغز مليان
حتى لونه صعب جبنا خوافيه
والسمعة اللي تنبني بخير واحسان
هي راس مال الادمي قول لي ايه
علي مونس بن جدي - الرياض
حليت لغزك يا السنافي ولي بان
واظنها السمعه وهذي محاريه
تعبت ادور لين حليته الان
واعجبني الحبكه ولا فيه تشويه
صالح البشري - الرياض
وعلى بحر آخر:
يا جِعْل ما يِنعَمِس لَك بال
يا خالد الحَل أبشر فيه
سمْعه سِواة الجرس رنَّان
تِقَلِّل الشخص أو تِعْلِيه
واللغز شارَه على نيْشَان
وفهْمك يِصِيبه أو يِخْطِيه
سعود عائش الحربي- جدة
لغز الأسبوع
كتبه للصفحة الشاعر عبطان السويدي من حائل ويقول:
يا ويش رجل يجي باشكال
كل يشوفه بالاعياني
اول وثاني الحروف سهال
وعكسه مرض صعب يا اخواني
نستقبل الحلول خلال «ثلاثة أيام»
من نشر اللغز على إيميل الصفحة:
rb-khozama@alriyadh.com