طرقت باب الوصل من شأن رد السلام على هل الحي جيران السعد بيت بيت

يا بنت ياللي بالطبق عند جيران
تعطيهم المقسوم من فضل ربّي
عادات كانت واجبه مثل الاركان
وكل جارن للمجاور يلبّي
يشاركه بافراح.. ولاّ بالاحزان
ولا الجار عن جاره بحاجه يغبّي
محمد عبدالله الشهري - جبل اثرب
طرقت باب الوصل من شأن رد السلام
على هل الحي جيران السعد بيت بيت
بين الأقارب يسود الود في كل عام
ويعم فينا احترام الناس وان جيت جيت
الوصل مبدأ الكرام اللي تعز الكرام
وبالخير موعود ياللي بالتواصل بديت
واللي يحسبونه العالم رفيع المقام
اللي على الوصل يبدأ قبل وقت المميت
عبدالله الذيابي - الطائف
ظروف الايام.. كم حطت وكم شالت
ومعادن الناس تُكشف من طرف حاله
كل ماتصد البشر: ب اعذار ما طالت
يظهر لك .. الجار في حاله وفي ماله
نتقاسم الحزن .. كل م احوالنا مالت
والضحك نتقاسمه في اطيّب احواله
من فضل ربي.. عوايدنا.. فلا زالت
جاري مع (جاري) الارسال ب اشكاله
بندر المطيري
فينا الكرم من زود أول وتالي
ماشي تغير بالنفوس الجميله
الجار يسأل له نزيد الوصالي
مره يجينا ومره احنا نجي له
نمد العطا بالخير رزقٍ حلالي
ونذوّقه من خيرنا والحصيله
ياما حلا العادات حسن الفعالي
ما شي تغير والحضاره دليله
ينابيع السبيعي
بنتٍ حلاها زاهي في نوره
واللبس يزهاها وفيه الطلّه
والزين ناهي باين فالصوره
بكفها اليمنى تشيل السلّه
سلّة حلى ماهيب سلّة كوره
ياهل المعرفه قولوا يالله
تستر عليها لاتجي في بحوره
وقولوا معايه رددوا ماشا الله
حمد عبدالله الوايلي - حوطة سدير
الطفلة اللي قادمة يم الأحباب
تحمل الورد الأجمل والمشاعر
وتزاور الجيران أحباب واقراب
هذا الوصل بالصدق ماهو بعابر
بشائر القحطاني - الرياض
نرحب بمشاركاتكم الشِّعرية،
وما تلتقطه عدساتكم من الصور الهادفة
والطريفة على إيميل الخزامى:
rb-khozama@alriyadh.com
صورة العدد (عدسة / خالد السلمي)