صوت الصورة

ياللي حمّلت الجمس قدمك مسافات
زود الحموله يابن الاجواد جاير
ان كان تسمع لسست بعض الاصوات
أحذر من الدفرنس هو والتواير
فايز فرحان السويلم - فيضة بن سويلم
الجمس يومه واقفٍ يشكي الزود
من حمله الزايد وقف مايسيري
ترى احتطاب الجور يقضي على العود
وحماية البيئه توجه نذيري
علي رشيد الرشيد - رياض الخبراء
الظاهر ان الجمس مافيه حيله
ولا عاد ينفع به جميل وجماله
الجمس واقف من حمولٍ ثقيله
وراعيه شكله ما عرف وش خماله
فيصل بن محمد بن سيف - الدلم
مسكين يا جمسنا المرصوص
ما عاد به حيل ولا قوّه
الشاص يم الكفر مقصوص
واسعافكم ما وصل توّه
عبدالكريم عبدالرحمن السلوم - القرائن
حمّلت حملٍ ما يشيله تريله
اتعبت جمسك والنتيجه خرابه
إبحث عن السطحه وجبها تشيله
واللي عمل ممنوع هذا عقابه
محمد بن عبدالعزيز الخنيفر - أشيقر
صورة العدد الماضي
مسكين حال اللي من البرد مقهور
والله يا أهل العرف مسكين حاله
الجمس حمله زاد جوراً على جور
واستسلم الماطور من ما جراله
صالح بن حسين الحارثي – نجران
وين أنت يا مدهال كل المسايير
اللي دعتهم ريحة النار يمّك
ارطى النفود اشره ولابه مخاسير
شوفة وجيه الخير تكفيك همّك
عبدالعزيز الصالح - حائل
جمسٍ قديمٍ حمله فوق ما طاق
من الحطب ربطات كومٍ يزمّه
ثمن ربط حبله وصفه على ساق
وقام يتفقد كل شيٍ يهمّه
فرح حمود الخميس – الرياض
يا راعي الجمس المحمل بحمله
أرفق عليه ولا تحدّه على أقصاه
دبّر أمورك ضاعت علوم صمله
موتر تعطل ما يساعدك ممشاه
حمد عبدالله الوايلي - حوطة سدير
يا أهل الحطب خلو الخردات
و روحوا لسوق الشريطيّه
تخيروا بأحسن الشاصات
و صيروا من الشمس فالفيّه
غازي بن قاعد العتيبي _ الدوادمي
الجمس حمله حطب ومساعده مكسور
غرّز وراعيه حاول ربط مسماره
ياللي جلبت الحطب من شرقي المظهور
أنا زبونه مع اللي ما طفت ناره
فهد بن عقيل الطويان - بريدة
يا راعي الجمس الحليبي سلامات
لاتحمل الماخوذ فوق احتماله
يخون بك وسط الحفر والغرازات
وكثر الحطب زاد التصحر جهاله
عبدالعزيز زعل العنزي - الرياض
شحنة حطب اسومها خمس خمسات
وان زادت السومه عطيناك بالكاش
منها السست نامت ومعها المقصات
حاطب نصوح وخايف الرب له خاش
عبدالكريم النغيمشي – الربيعية
ما لومهم لو الحطب صار ممنوع
من يوم شفت الحمل زايد بموترك
حملك ثقيل بخط تابع ومتبوع
ويكفيك خوفك بالطريق و توترك
محمد صالح الأطرش - رياض الخبراء
لا تعسر الجمس من شيل الحطب
السست تكسرت يابن الحلال
الكسر يصيبها لا جا مطب
والحمل ما يفيد ربطه بالحبال
عبدالمحسن بن محمد الجريسي - الرياض
الاحتطاب الجاير الله يعافيك
مضرةٍ لبلادنا .. والطبيعه
قطع الشجر ممنوع مهوب خافيك
يا قاطعينه جعلكم للقطيعه
مشاري الغنام - ثادق
الحطب واجد والكفر ناقص هواه
والجمس ما زبن بوسط النفودي
والسايق لحاله ما معه حتى أخوياه
افزعوا يحتاج فك العمودي
خالد بن ناصر المخيمر - روضة سدير
نستقبل مشاركاتكم الشعرية على إيميل الخزامى:
rb-khozama@alriyadh.com
أو الفاكس رقم: 4871070 زاوية ( صوت الصورة )
ونرحب بالصور الهادفة والطريفة .. ويا هلا