صوت الصورة

الشاصي اللي بالحطب صار مليان
ينذر علينا يا عرب بالبرودة
جانا الشتا.. زانت لنا النار ياخوان
تسعين يوم بالتمام امعدوده
دورة فلك يعلم بها خالق الجان
اللي عليه آمال خلق امعقوده
خالد بن ناصر المخيمر
روضة سدير
جيب الحطب زانت لنا شبت النار
نبي على ما قيل يجذب سناها
ودلالنا مركاة للضيف والجار
لا تحسب الدنيا تزيدك عناها
علي عبدالله الدريعي
النعيرية
كان الحطب يابس شريناه يا شاص
وكانه رطب تستاهل أقصى العقوبة
يلي على درب الجلاميد قصاص
يا الفاهم اللي ما يضيع دروبه
البرد ما ينفع معه قلت إخلاص
ما ينفع إلا السمر محلى شبوبه
محمد عائض عسيري
بأرسل على صفحة خزامى ثلاث أبيات
وأشارك مع الجمهور بالصوت والصورة
أنا شفت جيب الشاص قديم بلا لوحات
ومايل تقول ان فيه ستات مكسورة
ألا كيف سواقه يسوقه مع الميلات
ألا كيف يمشي به وهو طافي نوره
علي سلمان المشاري
حوطة بني تميم
الشاص ذكرني وأنا كنت سالي
شفته وذكرني زمان لنا فات
شفته وذكرني زحول الرجالي
رجال تشب النار في كل الأوقات
انظر حطبهم يا كريم السبالي
هذا الحطب شاهد لنا وأكبر إثبات
سلطان بن حمد الحبابي
الطائف
يا راعي الجيب القرنبع توقع
لا صرت عن بعض العواقيب منحاش
احذر تهور والتواير تفقع
دام الحمولة زايدة والكفر ماش
كان الحطب يا بس تراها ترقع
وكانه رطب مالك على الدار مغباش
تركي عيد الديحاني
يا زين شب النار في البر زيناه
في فيضة بين العصل والحثاقي
والبيت تبنيه الهنوف الخونداه
للي مزاياها بأحلى مذاقي
والجيب حمّل بالحطب ليا حناياه
ما يجلبه للسوق ولا السباقي
شجعان سعود المقاطي
الرياض
الارطا قل ولا بقى غير تاليه
كل يشيله ما حسب للزوالي
هذاك يجلب يبغى المال يجنيه
وهذا يحفظه للشتا ما يبالي
ياللي تجون البر نصحي وأبهديه
الجذع خلّه واحتطب بعتدالي
عبدالكريم بن ابراهيم بن خزيم
البكيرية
جانا البراد وطاب وقت التعاليل
وجا للحطب شبه على الكيف والذوق
في مجلس زانه فحول الرجاجيل
مع دلة فيها من الهيل مطبوق
وجه المضيّف زاده البشر تهليل
وكل دعا له خالقه يبعد العوق
ماجد بن عبدالله الماجد
الرياض
راعي الوانيت اليوم جاله نصيبه
ربح وفير وزود البرد حدّه
دوراً على اللي يرخي اليوم كيسه
ما همه إلا شبة النار عنده
في مجلس كل يبيه ويجي له
فيه الكرم شيمة من عصور جده
طارق بن خالد الزامل
أشوف الأرطا والعرب يجلبونه
هذا زمانه والليالي لياليه
لا صار سعره معتدل يطلبونه
اليوم يومه والبشر ما تخليه
وهذا الشتا معروف ما تجهلونه
يا زين شب النار وحنا حواليه
محمد بن عبدالعزيز الخنيفر
أشيقر
تكفون يالإخوان ياللي تحطبون
راح الشجر بالجيب ودسن ودنا
ياناس بالاسراف وشلون ترضون
ترى الشجر يا ناس زينة وطنا
عبيد فنيس الوهبي
النعيرية
يا راعي الشحنة عليك باهل الكيف
يزودون السعر ما ينقصونه
بيوتهم مدهال للجار والضيف
تلقا الخشب فالمجثوي يصرمونه
أهل الوجار اللي دلاله مهاديف
اللي ليا جا ضيفهم يكرمونه
هميجان بن عبدالمحسن المقاطي
الرياض
البرد قرب واحتسوا شبة النار
مع دلة صفرا وبن يماني
ونجر صدى صوته كما صوت مزمار
نعيد وقت قد مضى له نعاني
ياما حلا المجلاس بالليل سمَّار
بدر الدجا من مطلع الشمس باني
مشاري بن خالد الدعجاني
شقراء
الجيب تايوتا وممشاه بالهون
مشتاق يم دار الرجال الكريمين
دار الذي دايم على الطيب يبغون
دار الذي دايم على الضيف شفقين
شاص طويل والحطب فيه مشحون
هو غاية اللي له سلوم الهيامين
سعود بن سعد الحافي
الرياض
ياناس منظر حزين
ذا الفعل غبن وقهر
خذا الشجر له سنين
حتى نما وازدهر
ياخوي فعلك مشين
حرمت من الظل بشر
ناصر بن جمعان آل عوض
وادي الدواسر
يا رجل ياللي تسوق الشاص
حطبك ماهوب مربوطي
احرص ترى السوق فيه اشخاص
ممشاك ماهوب مضبوطي
ما شفت عزبة وتمر خلاص
اظن عزبتك في القوطي
معيد شبيب بن حمود القحطاني
زين شب الضو في وقت البرادي
والحطب سمراً من أجبال المدينة
متعبين الشاص في خداً حمادي
والحطب صفوة فوق محملينه
لحطب روح بين حضر وبوادي
جابه الجلاب للي مشترينه
شبيب بن حمود بن جلهم القحطاني
المزاحمية
شدّ الحطب من فوق جيبه على السوق
للي يشب النار والبرد داعيه
إرطا وغضا يابس ولا غشه اعروق
عن لومة الشارين عابيه بيديه
بالسوق عند اللي يعرفون مفروق
باللي يحده راعي الطيب يشريه
فهد بن عقيل الطويان
بريدة