صوت الصورة

وين الحطب تكفون هو والمعاميل
والتيس شبوا النار نشويه فيها
مادام قربتوا حليب المشاميل
عزالله انها ليلةٍ نحتريها
حسين القفيلي – نجران
اشرب حليب وجنبك السطل مليان
تلاحظ الرغوة بمنظر عجيبي
لا صار عندك من عطالله ذيدان
يعجبك منظرهن وتشرب حليبي
علي رشيد الرشيد – رياض الخبراء
أحب صحرا نجد وأعشق هواها
تنسى بها نفسي هموم وتفاكير
لا ذعذع الغربي سباني هواها
ويروي عطش كبدي حليب المصاغير
زادي بها قرصٍ وداري ثراها
في خيمةٍ تسوى قصور المشاهير
ناصر بن جمعان آل عوض
وادي الدواسر
صورة العدد السابق
تبارك الرحمن محلا زبدها
فاضت على سطلٍ من البل عبوه
يروى راعي الحلال ويشبع ولدها
ودرٍ يبات اليا لفا الضيف صبوه
سعد الحماد - روضة سدير
زان المكان وطاب جو المخيّم
وإلى لفيت اهله تفضل على الفال
واشرب حليبٍ صافيٍ ما يقيّم
الله يبارك له في الحال والمال
حمد عبدالله الوايلي - حوطة سدير
الصوره اللي شفتها فالجريده
ملان سطل وجنبه أربع غضارات
سميت بالرحمن محصي عبيده
وغلقت كل الصطل في خمس جغمات
عبدالله بن لافي – الرياض
منظر حليب ورغوته طالعه فوق
والله ذكرني في قديم الزماني
من قدمه للطيب يا عل ما عوق
واللي يبيعه ما يحوش الحساني
مخلف سعيد الشمري – الأحساء
الجو زان .. وطلعت البر زانت
نبي لنا خيمة .. وباقي المعاميل
الجو زين .. وازمة البرد هانت
صارت لنا من فضل ربي تساهيل
زبن مقبل العنزي
ياراعي الجيب وقف على طول
اشرب حليب مافيه قهوة وشاهي
حليب خلفاتٍ بها الطعم مقبول
حيثه مُفيد وفيه طب وتشافي
صالح محمد البشري
الإبل .. سبحان خالقها
فيها الشفا .. والطبابه
ربحان .. ربحان كاسبها
ولو شاب راجع شبابه
سميرة سليمان العبرة - الرياض
جواً عليل .. وفيه خيمه .. وخلفات
وصطل الحليب اللي به الخير مذكور
يا زينها جلسه جمليه وناسات
اللي بها لاشك فارح ومسرور
بشائر القحطاني - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة