غنى حمام الورق في عالي الصوت الرفقه اللي بين الازواج محلاه

يا حمام الدوح لاتخشى الذواير
اسكن الطاقه وراح اللي سكنها
مسكنك مهجور ما فيه النواير
غير لمبه طافيه مبطي زمنها
اختلف وقتك وخل القلب حاير
لا نظرت اطلالها والناس منها
احد عمره مضى والوقت ساير
واحد هاجر إلى يمت مدنها
حمد عبدالله الوايلي - حوطة سدير
جوز متوالف موقع في دريشه
بمبنى قديمٍ عاشٍ طير الحمامي
يصلح له رفوف يحط تعشيشه
ليصار بين اثنين ود وغرامي
وفيهم مزاين منه تلقى المعيشه
سعره مثل سعر الذهب بالجرامي
فرخه ولو وهو ما بعد صف ريشه
يبيض عنده بيض عجل شمامي
سعود عبدالعزيز الهزاع - نعام
حمامتينٍ وسط فتحة دريشه
في بيت مَبْنِيٍّ مِنِ اللِّبْنِ والطِين
بيتٍ ربوعه بعد عزٍّ وحيشه
أهله جفوه وْهَمَّلَوْ عِشْرةِ سْنين
يحكي عن الماضي وقاسي المعيشه
أيام كان الناس بالقِلِّ راضين
فرشة بعضهم من جريدٍ وخيشه
والجوع سايد بين بدوِ وْمقيمين
فيهم نقا مابه نفوسٍ غشيشه
الجار مع جاره على الطيب صافين
شَالوْا حمولٍ كايده شِيلِ ريشه
وعن كلّ ما يخزي تجدهم عفيفين
ناصر جمعان آل عوض - وادي الدواسر
غنّى حمام الورق في عالي الصوت
الرفقه اللي بين الازواج محلاه
وسط الدريشه عندهم وافر القوت
من فوقهم نور على الجسم يزهاه
لون جميل والعجب فيه مثبوت
ما ينجحد علم بها الوصف شفناه
علي رشيد الرشيد - رياض الخبراء
سولفي خبريني عن تراث النشاما
ما مضى خبريني بماضي له مكان
يا حمامه تهني سولفي بانسجاما
فوق دار الجدود وحلو ذاك الزمان
دار جدي وجدك له وفا واهتماما
ما مضى واهتني به بالليالي الحسان
وكلنا لك نغني يا حمام السلاما
فوق دار الجدود اللي بها الجو زان
محمد عبدالعزيز الخنيفر - أشيقر
الحب سوى بالحمامه سواياه
يوم الحبيب يكلمه صوت خافت
قالت حبيبي أكثر الهرج مابغاه
ابغى الفعول اللي لقلبي تهافت
عمري توخر وأنت عمرك تعداه
يا كود تكرمني عن أيام طافت
يالله عسى ربي يكافيك برضاه
وتشوف بالجنه مالا عين شافت
عبدالكريم النغيمشي - لوذة
المحبه واضحه جعله تدوم
بالهروج الطيّبه وبلا ملام
قولي أخبارك عسى مابه هموم
يا عسى ديار الفخر دايم سلام
سولفي يالطيّبه زين العلوم
عن ديار الخير وديار الكرام
يا حمامه يا عسى حظك يقوم
والرسايل مرسله زين الكلام
ريان محمد الخنيفر - أشيقر
حمام ياللي على روس المباني
راحوا أهلها وولفك وأنت وباقي
حمام ياللي لكل الحسن عنواني
بالشكل والصوت والوقفات راقي
سعود عائش الحربي - جدة
ياذا الغرام اللي جمع بين طيرين
واقف على الفرجه الأول مع الثاني
من شاف شكل الطير تدمع له العين
سبحان من هو صوره عالي الشاني
العشق نعمه والغلا له موازين
في كل وقت ومن قديم الزماني
خالد ناصر المخيمر - روضة سدير
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com ويا هلا
صورة العدد (عدسة / سعد المطيري)
Your browser does not support the video tag.