صوت الصورة

الحر ما يرحم ونحتاج تبريد
والقربة اللي علقوها بها الحل
تصب من ماها على كيف ماتريد
والبنت عبّت طاسته كامله فل
علي الرشيد - رياض الخبراء
يا بنت صبي من هناء الماء قرطوع
صبي عسى يمناك تعطى السلامه
الماء حلون في ذرى السقف مرفوع
في فربتن مشبوبتن هي علامه
والزي واضح على البنت مصنوع
صنع القديم اللي تباهت امامه
حمد عبدالله الوايلي - حوطة سدير
يا بنت ياللي كاشخه بالحلاء حيل
صبي من القربه وبلي لك الريق
الماي بارد طعمته موية السيل
وسط العريش اللي يسر المخاليق
الوقت حار ومتعته لا أقبل الليل
وبنور السراج يزين جو العشاشيق
خالد بن ناصر المخيمر - روضة سدير
مجلس من الطين وذكرى لها دور
وقربه من الماء يا حلو ذيك الأزمان
والبنت في لبسه مع الزين منثور
سراجهم شوفوه وناس لهم شان
أحيوا تراث اللي له سنين مهجور
وأسلافنا لآثارهم بالحيل ولهان
محمد عبدالعزيز الخنيفر - أشيقر
ما ضينا برادته من الجلد مصنوعه
يخبرك عن فضلها اللي شارب ماها
له صورة باقيه في الذهن مطبوعه
صفحة خزامى شاهد وردود قُرَّاها
مُر البدائع ترى تمثالها روعه
تخليد ذكرى لِقْربه ما نسيناها
عبداللطيف الحُمَيَّانِي – عنيزة
اشرب من القربة ترى شربها ذوق
يا زين ذا القربه ويا حلو ماها
وسراج علّق شعشع النور من فوق
والدار سقفه من جريد غطاها
تراثنا الماضي عزيز وله شوق
لا شفت انا الماضي أحن لهواها
عثمان ابراهيم الرشيد - الرياض
شفت الهنوف اليوم تشرب من المي
من قربة ومعلقه وسط ليوان
تمسك غضاره كلها ملح والزي
دور القرب معروف في ماض الأزمان
مكانها معروف بالبيت بالفي تروي
كبود الناس ضامي .. وعطشان
عبدالمحسن المحيسن - رياض الخبراء
من ماء الصميل اشرب هني من الغضاره
من كف بنتٍ ووقتها عندها اشغال
ملبوسها شارف عليه اندثاره
موروث حطته الخزامى للأجيال
الطين بيته بدلوه بعماره
والسراج بدّل بلمبةٍ نورها عال
سعود عبدالعزيز الهزاع – نعام
لا شفت بيت الطين ذكرت الأجداد
عاشوا على الأتعاب والطيب عنوان
واليوم تبدا احياءها لأجل الأحفاد
للمعرفة عما مضى بذيك الأزمان
وبلادنا بتراثنا اليوم يزداد
فيها من الذكرى لرجال لهم شان
ريان محمد الخنيفر