صوت الصورة

يا بشر شوفوا الجمل كله ذرابه
يشرب الما نظيف في غضاره
الجمل تطور في طعامه في شرابه
عايش بفن فاسلوبه مهاره
يا طفل ليه التعجب والغرابه
وقتنا وقت التمدن والحضاره
* ناصر بن جمعان ال عوض- وادي الدواسر
يا سعود أظنك ما تخلي الفكاهه
لقطت صوره نادره مالها وصوف
يشرب من الطاسه بزود الرفاهه
والولد حارس له ولا هوب مكلوف
الزين واضح ما يبي له وجاهه
قعود أسود ياخذ الرقم مكشوف
*محمد بن عبدالله المجلي- حوطة بني تميم
خله ترى العطشان يشرب من الماء
من شاف شكله راودته المروفه
خله لعله يرتوي ثم يرواء
باكر تشوفه كابراتاً ردوفه
* عبدالعزيز ناصر السياري- ضرماء
يا ورع ليه تقرب القعدان
لا تقطع ناس يغشونك
غلطان يوم تقربه غلطان
وأول خطا راح ماعونك
الزين لو أنه في الصمان
والعرق والصلب من دونك
* شبيب بن حمود القحطاني- المزاحمية
أمسى ولله شفت لي صورة فريدة
صورة جمل ومقظب بفمه غضاره
في جريدة «الرياض» أحلى جريدة
فالخزامى طالعه تبغى عباره
هذا ردي يا بكر جاكم نشيده
أشهد إن صورة عدد فيها مهاره
* سعود بن سعد الحافي- الرياض
يا ورع هالخلفه تبي منك فزعه
عضت على الطاسه تقول أتبعوني
تشكي عليك الحال وتقول جزعه
في شبك وإلا مهمله وإحلبوني
وأحس لحواري بالأنفاس نزعه
لاصدروا من حلبهم شملوني
* فهد بن عقيل الطويان- بريدة
يا جماعة والله أنها صوره عجيبة
حتى الطفل منها تعجب وأنبهر
الحوار اللي بالطاسه يشرب حليبه
سبحان رب حط في مخه فكر
فعله هذا ما فيه شيء يعيبه
لا تصور يا المصور تفضحه عند البشر
* خالد بن ناصر المخيمر- روضة سدير
خطفت أنا الطاسة من الورع قصدي
ظميان والظميان ما أحد يلومه
ماني بناوي الشر ولا تحدي
بروي ظماي ونفس حيل محرومه
هذا جوابي ياجماعة وردي
بعير بين قصته مع علومه
* صالح بن عبدالله التميمي- الرس
ما به حليب وروح اليوم يا صغير
أفهم كلامي جاك علم يقيني
هذا حليبي وأبتعد جاك تحذير
يا حيثي أبدى وأنتبه لا تجيني
لاجا الربيع أبشر وياما من الخير
تلقى الصبوح وطاستك طاستيني
* محمد بن عبدالعزيز الخنيفر- أشيقر
لو سمحت شوي أذوقه يالخو
لي ثلاث أيام عن طعم الحليب
لين أمي تشربه ما أنت بكفو
تستحل أمي وأنا عنها غريب
الزباين يوم شافوها أقلطو
يشترون أمي وأنا معها ربيب
* عقلا خزن العنزي- تبوك
يا زين شرب الشن بعد المراصيع
وعقب الغدا يالذ نوم العوافي
ياما شربتوا من حليبي قراطيع
وياما قطعتوا فوق ظهري سوافي
يا الآدمي والله لا شريك وأبيع
وأقول في هجوك بيوت وقوافي
* عبدالكريم النغيمشي- الربيعية
الورع يبغاء الصبوح وشربه الحاشي
لوه يشيل العصا والله ما همه
لأنه يعرف ان توه صغير ناشي
والحاشي يقول كلن له حليب أمه
وأبوه بين الغروس وبين الأدباشي
ولو يا كل ورع ضني ماهو بيمه
* محمد جلمود الشكره- الدلم
يا عزتي للجمل عطشان
ومع العطش نايشه جوعي
غلبان من جاير الزمان
جور الزمن شين ويروعي
تكفون فكوه يالوغدان
بارض خلا قفر وقطوعي
* بدر بن خلف الحزيمي
الله يعوظكم بدال الغضاره
إن كان ناب الهرش باقي به شوي
ظميان وبكبده لهيب الحرارة
كن الشعيب اللي وراه أيسر جوي
ياطفل يااللي في عيونه جساره
أسقوه ثم أرووه من قبل يثوي
* جميل بن محمد العنزي- الرياض
الجمل يشرب حليبي يا جماعه
محتقرني ما حسب حساب ليه
أشهد إني صرت من تحته رعاعه
لنظرته نظرتا يغمى عليه
أفزعولي وين من فيهم شجاعه
أفزعوا يأهل الشهامه والحمية
* مطر شباط مطر الفهيقي- تيماء