صوت وصورة

تقولها زينة الحلوات
توري الناس وتنبه
لي عام اذاكر به الساعات
واثمن الوقت ما العب به
يوم جيت الاولى بصفي جات
هديتي ضب ما احبه
خالد العنزي- المدينة المنورة
الصوره إللي جات وسط الجريده
صوره من القارئ على الوضع تعليق
والضب رجله يده مثل الحديده
لو يجرح الطفله يجيب التحاقيق
يافيصل إبعث لك إبصوره جديده
عسى تجي زانه يارب المخاليق
نواف نايف هلال الحزيمي- الفرعه- الجمش
الطفله اللي في الجريده إصغيره
إصغيرتن فالسن والعقل وافي
يالله يا عالم خفايا السريره
إستر عليها وجعل الستر ضافي
والضب إله ضربه تراها خطيره
ياطفل إحذر واطلب الله عوافي
مسعود عزيز هلال الحزيمي- الهلاليه
ويش السويه صرت انا اليوم حيران
أنا ورفاقي دايم بهم وحزون
في حالة يرثى لها كيف ننهان
ياهل الحمايه ردوا الصوت تكفون
لامن طرت قالوا نبي اليوم ضبان
وصرنا لعب لاطفالهم كيف ترضون
محمد بن عبدالعزيز الخنيفر-أشيقر
شفت صوره فالخزامى وأعجبتني
ضب أصفر سالبه ألطف بنيه
هي تراها خايفه لو كلمتني
قلت روحى للحمايه لو شويه
قول للمسؤول ضبي فوق متني
يالله أنك تبعد منها كل سيه
محمد عبدالله المجلي- حوطه بن تميم
الضب في حالة تدهور له سنين
كل طمع فالضب حتى البزورة
جماعة الضبان تشكي من الشين
واشوف صيد الضب ماهو ضروره
أعتق رقبة الضب عتق المساجين
ياورع يللي لك مع الضب صورة
ماجد سلمان المريبيط- القصيم
مسكت ضب كبير بأول الكنه
لقطت له صورة حتى تشوفونه
ماكنه إلا تقل تمساح ماكنه
وجه الشبه بينهم والرأس وعيونه
له عكرة تنعش الكبسة لها جنه
ياحلو لذة طعمها لو تذوقونه
علي غنام الغنام- رياض الخبراء
أشوف ضب بحضن صبي
ما صيب والله بخرازه
أكيد مغرق بجركل مي
أنا آشهد إن عكرته طازه
بس خوفتي ياعرب لآيدي
الطفل صبعه ليا بازه
عبدالرحمن عبدالله الطفيل- حائل
ماله امان الضب في يدين طفله
مادام له مخلب وناب وعكرة
شيلو عنها وزيدوا الراس بكله
وجيبوا لها لعبة من السوق بكرة
وخلوها تستانس وتلعب وتدله
وتنسي هذا المخلوق ينعاف ذكره
فارس الثبيتي- الرياض
الضب مجلد ونعساني
والورع طارت به عيونه
مرتاع ماهوب طرباني
الله يفكه من سنونه
لأتامن الضب من داني
حتيش لو غمض عيونه
مبارك محمد الدوسري- وادي الدواسر
الجود في صفحة خزامى لنا بان
ومعاني الشاعر بقافه دفنها
الصوت قل الخوف واضح للأعيان
طفل توافق جرأته مع زمنها
الضب كانه حي فبوه غلطان
اللي فتل عندي شنب خاف منها
فهد بن عقيب الطويان- بريدة
أنتم على الضبان مثل الذيابه
لو تتركون الضب يسلى ويرتاح
كان المراعى تمتلي بالمضبة
لا ينقرض ضب يبي عيش ومزاح
ضاوي هذال ا لعتيبي
أنا نجحت أبغى من أهلي هدية
نجحت أنا وأبغى هدية نجاحي
جابوا لي ضب وقلت وش ذا البلية
قالوا تسلي وإمزحي به مزاحي
وش رايكم باللي تسبب علية
حظي الردي واللي قردني صياحي
سعود بن سعد الحافي- الرياض
راحت تصيد والصيدة ضب
ياصيدة البين من صيده
يابنت خوذي كلام محب
من يقني الضب ما يفيده
يامن برد الشمالي هب
جحر وخلاك يا عيده
زبن مقبل العنزي- بريدة
الصيف أقبل وأختفت سحب وبروق
والجو منذر ياهلي بالحراره
والضب في حجر الطفله ياهل الذوق
من شاف شكله قال وش هالشطاره
البيت لك ياضب ماهو مرموق
نلقاك برا مثل جندي الخفاره
خالد بن ناصر المخيمر- روضة سدير
ياأبوي ذاويش اسويبه
عنك خذيت لي صوره
الضب في كبره مصيبه
وعلي به مصدر خطوره
وإن طول الوضع بأوميبه
وعند اهل العرف معذوره
محمد جلمود الشكره- الدلم
مربع الضب في جو الرفيعه
ردي حظه بين قناص وكنه
حمله الورع وهو ما يستطيعه
لايروع ورعكم شيلوه منه
من بغى الضبان أرض الله وسيعه
شغل الدتسون ورحله في مغنه
عوض شبيب حمود جلهم القحطاني- المزاحمية
ياورع فك الضب منته براعيه
راعيه قناص حزوم الصحاري
لانت بحافر جحرة ولا انته براميه
ولا تعبت لدورته في البراري
موجود في السوق وأبوك شاريه
وأنا أشهد أن الضب شاف العزاري
شبيب حمود جلهم القحطاني- المزاحيمة
يابنت مالك وللضبان
توك صغيره ومزيونه
شفتك غاصت بها النيبان
الخوف جلجلك برودنه
ابوك في مشهده غلطان
وش عاد لو شاف بعيونه
عبدالكريم النغيمشي- الربيعيه
ياهل الولد قدام يزعل ويرتاع
لا تتركون الورع والضب بيديه
ما يفرعه ميه وعشرين فراع
من قو حيله سيل الله مفاليه
وانتم سبب جلب المشاكل والاوجاع
مستيسرينه واكلينن نواميه
هذال بن سعيدان العصيمي- الرياض
أرسل سؤالي وسطورة
صوب الرياض في بلادي
ياورع ياراعي الصورة
خبرني عن مافي فؤادي
الضب حقيقة وإلا صورة
دمية في يد الأولادي