صوت الصورة

وجدي على بارد الشنّه
يطفي من الكبد لا هبها
قرطوع في لاهب الكنّه
كنه العسل عند شاربها
من جابها علّه الجنّه
الثلج ما عاد نرغبها
مبارك محمد الضعاوين - الرياض
بالْجنادرِيّه الموروث معروضٍ يشافي
شاهد القربه وبرّق بالصميل اللي وراها
من وسايلنا القديمه شي عرض وشي خافي
سلعةٍ تصلح هوايه ربّحت منهو شراها
ذكّرت رجلٍ كبيرٍ والصغار لهم ثقافي
ان حضرها بالمواسم أوْ بالصفحه تراها
أحمد السمحان - الزلفي
القربة اللي علّقت وسط ميدان
أحدٍ يصورها واحدٍ ورد ماها
تذكارها يبقى على مر الأزمان
يا كم سقت لأسلافنا في ضماها
يالله يا والي على كل الأوطان
مزون جودك هلها من سماها
عبدالعزيز فهد الريس - الرياض
ماضي مضى يا زين شوفه وطاريه
تراثنا الماضي له النفس ترتاح
هذي القرب للي عطاشا بتسقيه
ماءٍ هنياً عذب يا صاح وقراح
نحب كل اللي مضى وكل ما فيه
فيها المساقي دون بابٍ ومفتاح
عثمان إبراهيم الرشيد - الرياض
يا مصوّر صورتك ترى فيها وضوح
صورة الماضي تذكرنا السنين
ماضي ماضي تباريه الجروح
ما سلم منه الكبير .. ولا الجنين
وقتنا الحاضر نماري بالصروح
نحمد الله شاكرين .. وحامدين
حمد عبدالله الوايلي - حوطة سدير
يا الله يا معبود يا رب يا مجير
إنك تصد عنا الفتن .. والقراده
يا مصوّر القربه زيد التصاوير
خلوا تراثنا يشتهر بالسعاده
شجعان سعود المقاطي - الرياض
منظر الماضي ترى كلٍ يحبه
يذكرك بعصور ناسٍ راحليني
يا زين ماء القربة في وقت شربه
يهنا به الأجداد بماضي السنيني
الماء بالماضي يا صعب جلبه
وأسلافنا وقتٍ مضى صابريني
محمد عبدالعزيز الخنيفر - أشيقر
ياما حلا موية الشنّه
لا صرت تعبٍ وضمياني
اتراثنا اليوم له فنّه
يحكي لنا وقت وأزماني
صميل .. طاسه .. وشنّه
معلقاتٍ بميزاني
عبدالكريم عبدالرحمن السلوم - القرائن
يا بكر هذي صورتي قبل عامين
صوّرتها ذكرى مع اتراث اﻷجداد
أفخر بها .. وأعدها كنزٍ ثمين
والغرب لوتدري عن السعن ماباد
نمر عقيل
فيما مضى الناس محتاجه
ببرودة الماء .. ولا تلقاه
ياما من الهم .. وتواجه
بحرارة الصيف لامن جاه
بعصر القرب دون ثلاجه
من طعم ماها فلا تنساه
ريان محمد الخنيفر - الرياض
خل السقا ياللي ما تعرفه كود
تشرب من اللي علبته الخواجات
روح البقاله واشتر اللي به الكود
مختوم ومرقم بوسط الزجاجات
ذي شغلة الجدان يا خوك بالعود
يوم العرب دوره بليا كراجات
عبدالكريم النغيمشي
- لوذه
نرحب بمشاركاتكم الشعرية وما تلتقطه
عدساتكم من الصور الهادفة والطريفة ..
على إيميل الخزامى:
rb-khozama@alriyadh.com
أو الفاكس رقم: 0114871070