عجايب الصد

مل قلبٍ كل ما هبت نسانيس الهبايب
اعترض له ما يكدر خاطره عقب انشراحه
مر طاري صاحبٍ من صدته شفت العجايب
صاحبٍ بسبابه المعلوق ما تبرى جراحه
مشغلٍ فكري ومتعبني وتعبت النجايب
أرسل المرسول والمرسول ماجاب الصراحه
أشهد أن الحب عنوان السهر وأبو المصايب
قالوا إن الحب راحة قلت مافي الحب راحه
أذكر اللي فات واللي فات منه الراس شايب
أذكره وأذكر كلامه لا هرج وأذكر مزاحه
وأذكر السود الوساع وبعثرة شقر الذوايب
يسعد المولى مساه ويسعد المولى صباحه
شوفته مثل العياد وغيبته مثل العقايب
والمواجه راحة المشتاق لاهبت رياحه
اتسلى بالقصيد ويمه احث الركايب
كود ينزاح الشقاء ويطيب من طول كفاحه
ولا أنا قلبي عن دروب الهوى ماهوب تايب
الهوى مثل البحر وأنا خبيرٍ في السباحة
بس كأنه صار من عقب الغلاهم ونشايب
لازم أدفن ما بقالي منه في رمل الإزاحة
والعن الشيطان وأقول أنت ياخل السبايب
ما يطير الطير كان الطير مكسورٍ جناحه
صاحبي لو غبت عن عيني ترى ما أنته بغايب
الغلا قلبي مكانه والوفاء لابس وشاحه
لاتزود بداخل المعلوق وهاج اللهايب
طف نار الشوق والحب الكبير أعلن نجاحه
وإن نسيتك فاعتبرني من تحت عوج النصايب
ودامني فوق البسيطة قلبي لحبك مساحة