اللي نعزيهم حبايب وغالين

إن فقد صاحب السمو الملكي الأمير فهد بن سلمان بن عبدالعزيز فاجعة عمّت الوطن من شماله إلى جنوبه ومن شرقه إلى غربه لما له رحمه الله من خصال وسجايا حميدة وحبه لوطنه ولأبناء وطنه، وهذا ليس بغريب على سموه لأن والده سمو الأمير سلمان حفظه الله عوّد أبناءه على الكرم والحب والبذل والعطاء فمن شابه أباه فما ظلم.. وعبّر شعراء الوطن عن مشاعرهم الحزينة.. وهذا هو الشاعر الكبير خلف بن هذال العتيبي يرثي سمو الأمير فهد بن سلمان رحمه الله من خلال الأمسية التي أقامها في محافظة الطائف والذي أكد أن الشعر يعجز عن وفاء الأمير فهد حقه وان الاقلام لتعجز عن تسطير محاسنه... فتعالوا معنا إلى المرثية:
جينا من الدار البعيدة معزين
نجوب الأرض وقدرنا خابرينه
واللي نعزيهم حبايب وغالين
لولا الغلا مازاد صوت المكينه
لا عاد يوم فيه نسمع خبر شين
ماجت به النشرة يا شينه يا شينه
علمٍ يفجر بالضماير براكين
بين الضلوع القلب تسمع حنينه
القلب حن وفيضت عبرت العين
العين تدمع والمشاعر حزينه
شيخ رحل عنا ترك له محبين
محبوب والمحبوب يفقد بحينه
يوم الريوع الناس قالوا: فهد وين؟
وين الكريم بفارغ الصبر وينه
وقفت أصلي في صفوف المصلين
عصر الخميس وبالنعش حاملينه
يم المكان اللي انزوله مقيمين
وداعة الرحمن وموادعينه
نامت عليه الأرض باللبن والطين
بين النصايب ذاهبتنا ثمينه
فينا من اللوعه حرور وطواعين
والموت حق وكلنا ميقنينه
خيط المنايا حولت بالسلاطين
تحت التراب من العروش الحصينه
موت الرجال المحسنين الميامين
على الرجال افلاس واكبر غبينه
مكتوب.. واخزى الله عيون الشياطين
عمين عيون اهل القلوب اللعينه
مرت حياتك ياخو حصه على الزين
ومن عادة الطيب قصار سنينه
ياثرك من نو الثريا ودادين
يسقيك يا قبر بوسط المدينة
تضفي عليك غصون سدر ورياحين
من جنة الفردوس تلبس جنينه
مرحوم يامطلق رباط الملايين
من دون وجهٍ ياكلنه ايدينه
زبن الدخيل اليا التوابه من البين
بالجود والمعروف تندا يمينه
انقذ رمل.. وايتام.. واطلق مساجين
كم معسرٍ خلّص عنه كل دينه
يوم الكويت اجتاحها خاين الدين
وجونا فرير ورشدهم فاقدينه
صبّحهم المجرم وراحوا قطاعين
ضاع الامان بفعل فار السفينه
حيا وقال: الهم تراحيب واهلين
مع كاسبين الطيب يا طيب عينه
خلا لهم صدره بيوت وميادين
باع العقار وجاب ما بالخزينه
على جبينه للمروه عناوين
فرايدٍ مسطورةٍ في جبينه
ربّاه أبوه وعلّمه بالقوانين
جاب الاسد شبل طلع من عرينه
لا عل ما قدم يجي بالموازين
يومٍ به المعتق يفك الرهينه
الله يعوضه في شبابه بعلين
ويهوّن الكربه على والدينه
يا الله ياللي تبدل العسر باللين
تنزل على راع الرياض السكينه
وتلهّمه بالصبر حينٍ بعد حين
تجبر عزاه وفي مصابه تعينه
سلمان من حزنك ترانا محازين
ما تونسه يا بو فهد.. مونسينه
حنا مع الوافين دايم وفيين
والاوفياء للعهد حرصه وامينه
خلف بن هذال