الإعلامي منهل عبد القادر في قصيدة لرثاء ولي العهد: "فاقدينه"

أنشد الزميل الإعلامي الشاعر منهل عبد القادر قصيدة رثاء في فقيد الوطن والأمة الإسلامية، صاحب السمو الملكي سلطان بن عبد العزيز رحمه الله، عنونها ب "فاقدينه"، عبّر فيها عن حزنه الشديد لوفاة الفقيد.
وقال عبدالقادر في قصيدته:
إلى روح الفقيد الإنسان.. سلطان..
فاقدينه..
يا مسافات المدينة..
الشوارع كلها الليلة حزينة..
والقصايد فاقدينه..
فاقدين النور من كفه.. ومن غيمة يمينه..
ما بقى غير الحكايا..
والبياض اللي يغطي.. وجه سلطان وجبينه..
الرمل بآخر حدود المملكة غص وبكاه..
والمنادي ما لقاه..
والعلم ناداه من عالي سماه..
والوطن مفجوع من لوعة غيابه..
يسأل عيون الزمن.. سلطان وينه؟؟
اليتامى اللي عيونه حست بدمعة سهرها..
البلاد اللي غيومه سابقت غيمة مطرها..
الجنود اللي تنادي باسمه وتبني فخرها..
فاقدينه..
فاقدينه..
يا مسافات المدينة..
عطري روحي بصمت عقاله وسبحة يدينه..
واتركي التاريخ يكتب.. عن حكاياه وسنينه..
لو كتبنا قصته بالنور.. والله ظالمينه..
ما وفينا حقه الماضي ولا فضله ودينه..
يا مسافات المدينة..
الشوارع كلها الليلة حزينة..
والقصايد فاقدينه..
فاقدين النور من كفه.. ومن غيمة يمينه..
ما بقى غير الحكايا..
والبياض اللي يغطي.. وجه سلطان وجبينه..