يا عين هلي ماك

مرثية بالفقيد الشيخ مبارك بن عسكر الهاجري «رحمه الله»
يقول ابن حرفاش ياسامعينه
مرثية في اللي رحل قبل يومين
يوم الاحد جانا اخبارٍ حزينه
رسايل هزت قلوب الملايين
قالوا ترى اصحيبك تقافت اسنينه
امبارك العسكر زبون المجلين
اي والله اصحيبي وأقبل جبينه
واقدره ان كان منتم بدارين
الرأس طيب والروابع سمينه
ويحلها لا جات من بين الادنين
فقيدة يا اهل القلوب الفطينه
خسارة للهاجري والقحاطين
رجل لامن مات ينسى بحينه
ورجل ما ننساه مادام حيين
فرقاك ياشيخ المهمات شينه
لكن ترانا بحكمة الله راضين
ياعين هلي ماك لا تذخرينه
ابكي ولا ني بلايمك يوم تبكين
ابكي على اللي كلنا فاقدينه
يبكيه من غيرك الاف المعزين
يبكي عليه اهل القرى والمدينه
ويبكي الارامل والضعوف المساكين
يبكيه من حز الحبل في يدينه
اللي ورى بيبان بقعا مساجين
يا الله عسى قبره نعيم وسكينه
في جنة الفردوس خضرا البساتين
عسى كتابه ياخذه في يمينه
يوم الحساب ويوم عرض الموازين
لكن عزانا في الدروع الحصينه
اخوان وعيال على الطيب ضارين
شبل الاسد متربي في عرينه
خريج كلية اصحيب الضيافين