حِوَار رِئاسي

فاروق: أيه يا مولانا، يعني مطولتش زيُهم.
مرسي: وأنا مالي، همه اللي قالولي.
حسني: يا خيبتك، إنت عملت زيي؟.
السادات: ما تفكرونيش، أنا اللي ملحقتش أعمل حاجة.
جمال: مأنت كنت مِتفرعن قوي.
السادات: إنت ماتفتحش بُقك خالص، دأنا كنت بألملِم في «نكستك».
جمال: على قلوبهم زي العسل.
فاروق: مش عارف عجبهم فيك أيه!.
جمال: وطنيتي.
السادات: ياخويه وطنيتك بهدلتنا بعدك، ثم أيه «حرميهم في البحر» دي؟.
مبارك: دأحنا حاربناهم في «بارليف» ودوغري، وقعنا معاهم «كامب ديفيد».
السادات: وإنت مال أهلك؟!.
مبارك: مش برضه أنا حاربت معاك؟.
السادات: لا يا حبيبي، الكلام دا مش معايا أنا.
فاروق: إيه يعني حاربتو، ماحنا كمان حاربنا في فلسطين.
السادات: جتكُم خيبة.
جمال: أنا لولا «النكسة» كان زمان بلاد العُرب أوطاني.
مرسي: وأنا قبل «الوكسة» كنت بأقول الوطن إخواني.
السادات: ابعد يا راجل، دأنتو اللي قتلوني.
مرسي: وأنا مالي، أنا كنت وقتها عيل.
جمال: آه.. على أيامي، لما كنا بنغني لمصر، والوحدة، والسد العالي.
السادات: الأغاني منفعتش، مع إني كنت عالربابة بأغني .
مرسي: الموسيقى حرام، انتم ملكُومش مُرشد؟!.
فاروق: إنت يا جمال خذت عالجاهز، دأنا اللي ربيت في «ثومة» و»عبوهاب».
جمال: بس مغنوش من قلبهم، إلا معايا.
السادات: لو عالأغانى «حليمو» والبنت «نجاة» كانوا مشعللين فترتي.
مبارك: أنا مفيش حد ما غنالي، بس مش فاهم ليه ما كانتش أغانيهم بتثبت؟.
مرسي: إنت كنت عدو للشعب.
مبارك: يا روح خالتك، أمال سيادتك مشرف معانا هنه ليه؟.
مرسي: هنه فين؟.
فاروق: في التاريخ يا مولانا.
مرسي: والتاريخ ليه، أنا راجع للحاضر، والمستقبل.
مبارك: الله يقطعك ضحكتني، دي سكة اللي يروح ميرجعش.
جمال: أنا لسه عايش في ضمايرهم.
السادات: همه كده، عاطفيين، بس لو مكنتش مُت وسطِيهم، كانوا قتلوك.
مبارك: بس «قتلتك» جات بفايدة، داحنا توعينا ومعدناش نخرج بدون حماية، ودروع.
مرسي: أمال أنا خلعوني ليه؟.
جمال: إنت ما كنتش محسوب.
مرسي: ليه دأنا المنتخب الشرعي الوحيد وسطيكم.
مبارك: أهي «شرعيتك» دي هيه اللي جابتك الأرض.
مرسي: أنا كنت ناوي أهد التاريخ وأبنيه ثاني.
فاروق: ربنا يهدك، ماتبني جنبيه.
مرسي: بس تاريخنا أكثره حرام.
جمال: أوعه تكون تُقصد الأهرام.
مرسي: كنت عايز أسويها بالأرض.
السادات: روح إلهي ينتقم منك؟.
مرسي: تفتكر مش حيرجعوني؟.
مبارك: قل للزمان أرجع يازمن.
السادات: آه لو أقدر أرجع ساعة واحدة بس.
جمال: كنت حتعمل إيه يا فِتك؟.
السادات: ما كنتش أحضر احتفالات.
مرسي: حتى لو المرشد أمَرك؟.
السادات: وهو حيحوش عني الرصاص؟.
فاروق: أنا مش ندمان خالص، خرجت منها صاغ سليم.
جمال: طب عيني فعينك يا ملك.
مرسي: المهم أنا مُت، وألا أيه؟.
مبارك: إنت مت، بس فتنتك عايشة.
د. شاهر النهاري